موعدنه بالطف يا ضوه العين .. يمه

يوم إعله صدرك تسحق الخيل.. يمه

يمه لا تبجي دموعك عذبتني

أكثر من الكسر يبني ألمتني

ما أودعك و إنت جرح الما عفتني

نلتقي بالطف و أقلك شيبتني

يالغالي تتهشم لك إضلوع .. يمه

و إشلون أقبل نحر مقطوع.. يمه

دمعي إويه مدمع زينب يسيل.. يمه

يالبجيت إبضربة المسمار دمعه

سهم المثلث تره قلبي يقطعه

من خرز ظهرك يبعد أمك تطلعه

و زينب إتنادي إلك يحسين رجعه

أشعر يغالي إبجمرة إضماك.. يمه

و سهم المثلث صابني إوياك .. يمه

جسمي إويه جسمك أصبح إنحيل.. يمه

هذا مو أصعب وداع إموادع أمك

الواداع العلنهر أكثر يهضمك

إوداع أبو الغيره صعب يبني يألمك

ينكسر ظهرك عليه و يروح عزمك

لمن تنشده إعله العلم وين .. يمه

جوده و تشاهد يمه جفين .. يمه

هالخوه بجت حته قابيل.. يمه

يبني كل هذا الجرالي مو عجيبه

وي مصايب زينب إتهون المصيبه

آني عندي أحباب بس هيه غريبه

و آنه محميه إبعلي و هيه سليبه

لمن تشوف إعله الرمح راس.. يمه

تصرخ يخويه إقعد يعباس.. يمه

ما عندها والي بس العليل.. يمه

ما يودعني المصاب و لا أودعه

يبني و إمصابك لوادي الطف أتبعه

الإصابع ليش عندك يبني تسعه

و آنه بين الخيل أدور وين إصبعه

ألطم على ضلعي و أناديك.. يمه

علمني يا جرح اليأذيك.. يمه

أنصب نياحه إعليك و إعويل.. يمه

آنه غسلني علي و بيده دفني

و إنت تبقه إبلا دفن يا وسفه يبني

و بمنيتي حيدر الوالي حضرني

و إنت وحدك و آنه جيت و ظهري محني

عالغبره جسمك عاري مطروح.. يمه

و ألطم على ضلعي يمذبوح.. يمه

جسمك يظل إبلايه تغسيل.. يمه

يبني صورة محسن إتظل إعله بالي

و إنت بيدك ينذبح طفلك يغالي

حيرتني و عذبت حالي الليالي

يا حزن زينب غريبه إبلايه والي

تعتب عليك إبدمع العيون.. يمه

و إتقلك إقعد شوف المتون .. يمه

عنك تقلك باجر إنشيل .. يمه

يبني أم الفاجده إسمع نداها

ليله تنده يا علي و نايم ضناها

يبني رمله إعله الهزل تنصب عزاها

تنظر إشموع العرس أظلم ضواها

يتحن جفها إبدم الخضاب.. يمه

يفقد شعوره اليفقد أحباب.. يمه

زينب عليها الشامت إيعيل.. يمه