آني مهديكم راعي الأمر...لا تسألوني وين القبر

نسأل البتول...نسمع إشتقول...لا تسألوني وين القبر

نروح الفاطمه نجبر كسرها...نناشدها و تعلمنه إبقبرها

يشيعه إبطلعتي يبرد جمرها...نريد إنشوفه يا جف السطرها

نذكر العصره و كسر الضلع...مره للمحسن نجري الدمع

جرحه ما يزول...نسمع إشتقول...لا تسألوني وين القبر

نريد إنشوف قبرج يالزجيه...تجاوبنه و تون وتون خفيه

تقول الجايني يسأل عليه ...أريده إيروح لرض الغاضريه

يبني يالمهدي إبجيتك هله...إبتدي إبثارك من كربله

بضعة الرسول...نسمع إشتقول...لا تسألوني وين القبر

عليّ كسر الضلع أسهل يمهدي...أصد لحسين و إدموعي إعله خدي

تره سهم المثلث صاب جبدي...جفوفي إمقطعه إعله الشاطي عندي

نايم إبعيني ذاك السهم...ينتظر جفك راعي العلم

و إقهر العذول...نسمع إشتقول...لا تسألوني وين القبر

إذا محسن جرح واحد جرحني...أخبرك سهم عبدالله ذبحني

حنه ظهره إعله إبنه و ظهري محني...أنا و حسين إجينه إنصيح يبني

آني بين إبني و بين الطفل...حايره و همي ما ينحمل

و الشرح يطول...نسمع إشتقول...لا تسألوني وين القبر

تهون إقبال زينب كل مصيبه ...أنا يمي علي و هيه غريبه

تمنت حيدره و من إنين أجيبه ...يشاهد زينب الحره سليبه

وي حزن زينب حزني يهون...بعد أبو الأكبر تدمي الجفون

سحقته الخيول...نسمع إشتقول...لا تسألوني وين القبر

أجي يوم القيامه و بيدي جفين...يبو فاضل أصيح و مره يحسين

يجيني الصوت يالزهره إشتريدين...و أطالب بالقصاص و تدمع العين

بالحشر و أطلب ثار الجفوف...ثبتن راية عقد الطفوف

نسأل القبول...نسمع إشتقول...لا تسألوني وين القبر

ييمه إسنين أنتظرك يغايب...تعود و تشهر السيف و تحاسب

أريد إبثار أبو الأكبر تطالب...أنا شفت العجايب و المصايب

آني أنتظرك يبني عمر...من تسل سيفك يشفه الكسر

بالغضب تصول...نسمع إشتقول...لا تسألوني وين القبر