يا جف العدل يا يوم إتنشف دمعة البضعه

يم باب الأمل أرواح منتظره الوعد عالباب

من أرض البقيع إتشوف ممتد للطفوف إمصاب

و بهذا ظلام الليل عنها كوكبك شو غاب

و من باب الليالي هاي كل يوم و طلع حطاب

و بصدور الضحايه إيجول مسمار أشرس الأصحاب

ينزف كل جرح من يوم طفوا شمعة المحراب

و هذا علي ينتظرك من بيته طفوا جم شمعه

يا من رايتك جبريل برض الغيبه حارسها

كل هاي المظالم ذاك أول طاغي أسسها

للقدسية يظلمها و الهادي يقدسها

هاي الطاهره و إشلون جف الظالم إيمسها

يا ثار السمه بيدك إمتون أمك يلمسها

منتظره إعله باب الثار منك لا تأيسها

فرح قلب أمك هاي و بيدك للفدك رجعه

جرح الفاطمي لليوم بليالي الصبر يسهر

و بطول الزمان إجروح تنزف كلها تتنطر

و صابر كل قلب تلقاه و صبره من صبر حيدر

من شاف الدموع إتسيل دم من سورة الكوثر

من شاف الوديعه إشلون مجروحه و جفن أحمر

من شاف إعله باب البيت شمس العصمه تتكور

من شاف الصدر مجروح ينزف منكسر ضلعه

يمته رايتك يمته لعيون الجروح إتلوح

و تاخذ هاي اوجاعك و بيها للبقيع إتروح

إتشوف المحسن و أمه يبن العسكري ابيا روح

هو إمغسله دمه و امه بس دمع و إجروح

طلعه من البقيع و بيه لرض الطف يغايب روح

تلقه يم أبوه حسين ينتظرك طفل مذبوح

إتشوف إهناك عبدالله ضامي و دمه ليرضعه