ينتظرك من يوم الباب... يا مهدينه

طولت الغيبة و نتأمل...مجروحين و عنك نسأل

يا مهدينه يا مهدينه

حمل الما تشيله إجبال بعدك شالته أحبابك

آهات الضلع و الباب صارت علت أسبابك

الحزن و الدمعه و الياويل بدن من لحظة إغيابك

يالتدري ابعتبنه إيطول ضمايرنه تدق بابك

من يوم إغيابك لليوم... يا مهدينه

بعيونك ما شفنه النوم ... يا مهدينه

نشعر بالموت و نتحمل...مجروحين و عنك نسأل

يا مهدينه يا مهدينه

من طبع اليغيب إيعود يرجع من بعد فتره

حته الطير اللي يهاجر يجيبه الشوق للشجره

صار إسنين نحلم بيك فجر الأمل ننتظره

عاشرنه السهر و الليل وعدك ما قرب أمره

ما تسوه الدنيه إبلياك... يا مهدينه

رادوا ننساك و ردناك ... يا مهدينه

ملينه الدنيه الما تنمل...مجروحين و عنك نسأل

يا مهدينه يا مهدينه

تانيت الشرار إرماد و إنت و لا طفت نارك

بجه اعليك النخل و الماي و إحنه إنتابع أخبارك

ننشد عنك المصباح يمته و تاخذ ابثارك

سيف الما يضمه إقراب صار الليله خطارك

بيمينك سيف الكرار... يا مهدينه

يتأمل من عندك ثار... يا مهدينه

كل يوم و يحصدنه المنجل...مجروحين و عنك نسأل

يا مهدينه يا مهدينه

جرح الليل ينزف موت و إحنه الموت ما همنه

و حق إعيونك امقصرين لجلك لو نزف دمنه

يفرقنه الدهر و إنقول حب الغايب إيلمنه

نصبر ساعة الشدات من عندك تعلمنه

لا عين و لا مهجه إتنام ... يا مهدينه

من بعدك ظلينه أيتام ... يا مهدينه

و بدمنه العنوان إتسجل...مجروحين و عنك نسأل

يا مهدينه يا مهدينه

رضينه إنودع الدنيه و لا عيش المذله إيحل

مشينه إبدربك إمغمضين إبونه و إنت حادي البل

صبحنه إبكل بقاع الكون ثارت الضل

سامحنه العتب ياذيك بس تدري الهجر يقتل

لديارك يا ساعه إتعود... يا مهدينه

قائدنه و إنت الموعود... يا مهدينه

و الواقع يا وسفه إتبدل...مجروحين و عنك نسأل

يا مهدينه يا مهدينه

يا شمس الضحه إخلافك صارت ظلمه دنيانه

تعبنه الزمان إهواي و ضيم إشكثر راوانه

وصلت حدها يالمجحوب إنهض و إحضر ويانه

شاهد لو ردت عالحال صور عدنه ضحايانه

ذوله إحنه الطيبين ... يا مهدينه

ذبحونه و ما عفنه حسين ... يا مهدينه

أحبابك و يلوم اليجهل...مجروحين و عنك نسأل

يا مهدينه يا مهدينه