غايبنه يجي ابيا يوم طالت مدة إغيابه

طبع الواقع ابحيره إعتابه يجرح الخاضر

حزين إتشوفه كل وقته دمعه ابطارف الناظر

عينه اعله الفرج تربي و كل عمره إنقضه صابر

امتاني اليحل مشكلته بأمل وي حيرته امساهر

لا يغمض جفن و ينام... حته يعيش بالأحلام

ليالي يحسب و أيام

خلص صبر الذي عنده لجن ما خلص إحسابه

العنده مشكله امعسره يدور عن اللي يحلها

و النفسه عزيزه اشلون قلي يقدر يذلها

يبن الحسن ما تنهض غيرك جا بعد شلها

منك شيعتك شتريد لون يالمهدي تسألها

تريدك تكشف الأسرار...عليمن هجموا اعله الدار

و ابحال الوديعه اشصار

يبن الحسن دار أمك يخبرك بالجره بابه

أخافن ينجرح قلبك إذا أكشف لك المخفي

على امصاب الجره الأمك يمهدي الدمعه ما تكفي

و لا يكفي اللطم و النوح ولا دم روسنه إيوفي

قبل ما طفوا عين امك يريت إعيونه تطفي

و قبلها إحنه تمنينه...كسروا كل ضلع بينه

ما تكفي بواجينه

سبب كل مصايبنه يوم الباب و إمصابه

الله يلعن الدقوا أساس الظلم عل العتره

يوم الهجموا اعله الدار و هضموا فاطمه الزهره

ابذاك اليوم أبو السجاد داست خيلهم صدره

و أثبت لك ابنفس اليوم عبدالله إنقطع نحره

و من اخذوا علي مجتوف...طاحت راية المعروف

و قطعوا للكفيل إجفوف

كسر الضلع يوم الطف كلها إنكشفت أسبابه

يوم الباب أسراره كلها ابكربله إنكشفت

الحرب حسين ابو اليمه خيل و قوم من صفت

و دمعة فاطمه الهلت ظلت تجري ما نشفت

زينب عادت الموقف لجسم حسين من وقفت

و الضربوا متن أمها...دعوها حايره ابهمها

و جم حاقد الشتمها

نفس الهجمه نفس النار وسط الخيم لهابه

من ذاك الوكت لليوم غذت تتعاقب الأشرار

واحد سلم الثاني بغضه ضد علي الكرار

و إنت ابعينك إتشاهد عالشيعه اشجره وشصار

يبن الحسن شمتاني ما تنهض تصيح الثار

يا ثار الضلع و الباب...و راس البلسجود إنصاب

و ثار الظل بلايه إثياب

ضامي إنذبح قلهم ليش و ليش إنسلبت إثيابه