حته حسين و الشبان تتوادع اويه العيله

يا فجر الفراق ابهون الله اعليك لا تطلع

حته إبنات حامي الجار من الأهل تتودع

مصباحك يا فجر الشوم بيه الحرم تتروع

هون لا تطر إبساع... بيك إقلوبنه ترتاع

هذا الليل ثاني إوداع

بيه إنريد نشبع شوف منه و من مداليله

ليلة عاشره إبعاشور من علقت روايه الشر

و العسكر زحف كله و قام اعله الخيم يفتر

بالشر هيست زينب قلبها إنخمش و إتطير

صاحت يا بنات الدين ... علايم بينت للبين

قومن نعتني لحسين

و إنطب لعد صيوانه و من الخوف نشجي له

زينب لمت النسوان و إتعنت الصيوانه

لاجن ترجف امن الخوف و من الهضم نحلانه

شافت يمه العباس و إقباله الريحانه

طبت قعدت إقباله... و منها العين هماله

لمن عاين إعياله

قامت دمعته تجري إعله أطفاله و عله العيله

قالت له يبو السجاد هاي الوادم إشعدها

إعلينه إشتدت ابهالليل و البيض إبسواعدها

هم إعرفت نيتها و شنهو إوياك مقصدها

يبن أمي خذانه الخوف... من شفنه الجموع إصفوف

جيتك و القلب ملهوف

كثر الخوف يبن أمي إعيالك أمست إنحيله

لمن سمع حجي إخته هل دمعه و صفق بيده

و قام ايعاين الشبله و نوبه إيعاين إعضيده

قال إلها يبنت الليث جتلي الوادم إتريده

و عندج يبت حامي الجار ... هالليله إخوتج خطار

يختي و الصبح لو صار

يامر بن سعد جيشه و تهجم عالخيم خيله