يا هضم أكثر...شتقول يا حيدر

تذكر يبو الحسنين يوم الغدير القوم... حين إصطفت

بالبيعه و الميثاق و العهد و المرسوم... كلها إعترفت

بأمر النبي المبعوث آلاف و إجت و إتحوم ...بيك إحتفت

و الهادي لمن غاب و إتنفذ المحتوم... لنها إنكشفت

بالكوفه نفس الناس هم عقب ليله و يوم... تالي إختلفت

من عدها مسلم شاف ضيم و غصص و إهموم... حين إنحرفت

ناس التعيش أشرار...إشتعقد يا كرار

تترك المنكر ...شتقول يا حيدر

يا با الحسن شتقول هم حاسب إلها إحساب... هاي الخدمه

أم تدري تغدر بيك و إتخونك الأصحاب... و ابها السرعه

لتصدق الخوان لو عاشر الأطياب... يترك طبعه

بالكوفه رد إنعاد يومك يداحي الباب ...من أهل البدعه

مسلم لفاها إبطيب قلبه عليهم ذاب... مثل الشمعه

بعيونه ينظر ناس ما يدري لنها إذياب ...هالمجتمعه

و الخاين الغدار...لو عاشر الأطهار

هم تظن يطهر...شتقول يا حيدر

يا با الحسن هيهات للذل و الإستهوان ...عزمك يجنح

إنت أمير الكون و اعله الإنس و الجان... وزنك يرجح

إزمام العيله ابيمناك متهمك العدوان... خل تتبجح

خانت عهدها اوياك تبعت هوه الشيطان... إلمن تنصح

يومك يبو الحسنين تذكاره بالأذهان... ظل يتوضح

مسلم شبيهك شاف جور و جفه و خذلان... مثلك أصبح

مسلم حمل أكدار...و إنت إحملت أخطار

يا حاله أخطر...شتقول يا حيدر

إنت الأمير و بيك عن وجه الأمه إنزاح... ليك الشده

مسلم سفير حسين مثلك بنه الإصلاح ...شيد مجده

أروي لك اللي صار مسلم امن الأشباح ...و أهل الرده

لهفت موده و طيب مسلم قصدها و راح ...ظنها إتوده

كتبوا عهد وياه بسما بده المصباح... نقضوا عهده

عن هالبشر شتقول عن جهل لو إيضاح... وقفوا ضده

عن علم عن إصرار...لو عن جهل أفكار

لو طمع أثر...شتقول يا حيدر

مسلم غريب إهناك ريتك يبو الحسنين ...جنت إتشوفه

للكوفه قاصد ضيف مجتمعها الطاغين... خان إضيوفه

ما يدري هالأوغاد تاليها رمشت عين... كلها إتعوفه

مو بس عصرهم ذاك كل عصر موجودين... أهل الكوفه

يم طوعه راح و جيش جدامه من صوبين... سل إسيوفه

منهم أبد ما خاف حيث اعله حال حسين ...مسلم خوفه

عسكر قصد جرار...و إملوحه الأشفار

إشرايد العسكر...شتقول يا حيدر

المنكر يداحي الباب عدهم صبح معروف ...و العز غايب

مسلم وحيد اهناك لاجن يموج إصفوف... جيش الغاصب

و إتولته الأوباش إسهام و حجر و إسيوف... من كل جانب

ما همته الأشرار و لا قلبه هزه الخوف... إلهم واثب

مثلك غضب و الجيش يندهل حين يشوف... مسلم غاضب

معروفه بالميدان إلهم عزم موصوف ...صفوة غالب

راعي العزم لو ثار...ابهالموقف اشيختار

عالصبر يقدر...شتقول يا حيدر

هالأمه خانت بيه عزم ابن إخوك اهناك... أصبح أمه

راعي الهدف معروف عالجمره و الأشواك ...يسحق جدمه

منك ورث هالزود من مقدرة يمناك... وارث عزمه

وسفه ابرهيف الجور هالمجمع السفاك... وذر جسمه

مو دمه هذا السال جنها تسيل إدماك... دمك دمه

خالد يبو الحسنين مسلم يظل وياك... خالد إسمه

إشعندك بعد أخبار...مختلفه هالفجار

عن أهل خيبر...شتقول يا حيدر