عالباقر آنه المنفجع ..... و من انين أجيبك يا دمع

امن النوايب ..... جفني ذايب

و من انين اجيبك يا دمع

* * * * *

بجيت اعله النبي و اعله الوصي الأنزع

و عله الزهره و إبنها الحسن أتفجع

و بجيت اعله الوكَع مذبوح بالمصرع

و عله السجاد صبيت اشكثر مدمع

من هالنوايب و الغصص ..... حته الدمع مني خلص

دمعي ناضب ..... جفني ذايب

و من انين أجيبك يا دمع

* * * * *

ابكثر ما هلت ادموعي عله العتره

من دمعاتي ما ظلت و لا قطره

وين اللي يدايني و لو عبره

عله الباقر أصبها و أجذب الحسره

وين الذي ايسوي فضل ..... ايدايني دمعه أرد أهِل

ظني خايب ..... جفني ذايب

و من انين اجيبك يا دمع

* * * * *

حجيت اوياه و آنه بمخلفات البين

يا الباقر أجيب الدمع و أبجي امن انين

ما خلولي أجدادك دمع بالعين

بجيت إلهم بجه زينب لخوها حسين

بالنايحه اكَضيت العمر ..... لا ظل دمع لا ظل صبر

ابها المصايب ..... جفني ذايب

و من انين اجيبك يا دمع

* * * * *

يا الباقر خلص دمعي و عشت مهموم

يحق لي ابدال دمعي اعليك أصب ادموم

يا وارث مصايب جدك المظلوم

مثل حال الحسن عمك رحت مسموم

قلب الحزن قلبك ذبل ..... و آنه اعله شفرات الأجل

قلبي لاهب ..... جفني ذايب

و من انين اجيبك يا دمع

* * * * *

يا الكَضيت عمرك بالكدر و النوح

و اشلون اكَدرت بالطف تصبر الروح

إقبالك عمك الأكبر وكَع مذبوح

و دم نحر الرضيع اتشاهده مسفوح

و جاسم صريع اعله الترب ..... احملت المصيبه ابيا كَلب

عالغوالب ..... جفني ذايب

و من انين اجيبك يا دمع

* * * * *

و اليوم الأجل يا سيدي صابك

عذبني زماني ابلوعت إغيابك

خلص دمع الجفن ما حاسب إحسابك

يا ريت أملك دمع و أنحب عله امصابك

راح أجري من عيني الدمه ..... و أجعل مصابك خاتمه

و لا تعاتب ..... جفني ذايب

و من انين اجيبك يا دمع

* * * * *