يمته وحي الله ينادي ابطيبه غايب الإسلام إجه امن الغيبه

الفرج آيه الفرج يا يوم الفرج و الله ما ظلت بعد عدنه مهج

ابحر أظلم طحنه و أخذتنه اللجج من ينجينه يا راعي الهيبه

اشنحجي وياك اشنخبرك يا هضم الدين أصبح جمره و الدنيه ظلم

و شفرة الصارم التوصل للعظم و هاي هم بيها يغايب طيبه

اشما يدور الفلك بينه و يستدير اليوم أنجز من أمس و أتعس يصير

نلحق الصفقه و نطارد عل الصفير ويَ تشريج الهوه و تغريبه

لو تناشدني اشعرفنه من الكتاب و يا حكم بالعجل ننطيك الجواب

نعرف انسوي الخطأ أحسن صواب ابحيل تسطير الحجي و تركيبه

صرنه منعرف الثجيل امن الخفيف و صرنه منميز الوضيع امن الشريف

نجعل المعيوب مستور و عفيف يا وسافه و الشريف انعيبه

اتشوفنه كل سال جبهه ننتمي بس يراونه المطامع بالومي

و اليجي لينه و يعلمنه الرمي بالسهام انقوم احنه انصيبه

اتضيعت أيامنه ابعالم خيال و نصبح و نمسي ابلغاوي و بجدال

و لو فرد بنيان نبني اعله الرمال ألف مبنه انسبب ابتخريبه

و أهل لطماع الأجيره ابهالوكت اسمعت لابد بيها و بعينك شفت

شغله لو صارت لك و ليهم رحت بس تحاجيهم تصير انهيبه

لون ما هالعمل عدنه بالوجود صاير و كل يوم يالغايب يزود

ما علينه استولت اليوم اليهود و ابوطنه جلّبوا تجليبه

احنه أفسحنه المجال الها الكفر و احنه أظهرنه العداوه و الغذر

الأجنبي امن الخوف من عدنه يفر لجن لجل الطمع احنه انجيبه

استولت اعلينه و كل حقنه انغذر و لينه دكوا سجر يوفون الضرر

لجن ما نعرف ابيا يوم و شهر حجي امسطر دّين بقواليبه

من يوفي الضرر من ذوله البهم ابيا حميه و غيره قلي يا شهم

اتصدق انته لو قلت فرخ الغنم من عقب أمه ترضعه الذيبه

بعد يزيد العتب و اعليك السلام خاف يا المحجوب ياذيك الكلام

و أرجوا تقبل عذري يا نسل الكرام و عذري عندك ينقبل أدري به

لجن خليني أعزيك ابمصاب عمتك زينب يبن داحي الباب

بالحبل مجتوفه زينب و لرباب و هالمصيبه هم مثلها امصيبه