جم دوب ننطر طلعتك يالمهدي

و يا يوم سيفك بالمهالك يحدي

نصبر و تعلم بالصبر ما يجدي

تظهر يا يوم ... يا معلوم ... و اتطفي النار بنار

يا ثار يبن الحسن تقدر تنساه

لليوم جدك ما نشف سيل ادماه

جم محب صوب الكعبه تشبح عيناه

مدمعنه ايسيح ... و إحنه انصيح ... يمته اتلوح الأنوار

يالمهدي جدك ينتظر منك صوت

لا تخلي يبن الحسن ثارات اتفوت

يا يوم بيدك يرتفع سيف الموت

تصرخ يا حيف ... و يمته السيف ... يقطع رووس الاشرار

تظهر و سيف الإبه ايلوح بيمناك

اثلاث ميه و ثلاثه و عشر تمشي اوياك

اظهر و عين الباري هي الترعاك

تنسه المظلوم ... لو هليوم ... تظهر شنو التختار

لا تنشد إعله الرايه ذيج اوياها

رايتك يم المشرعه تلكاها

عمك العباس بفخر حاماها

و الرايه النوب ... يالمحجوب ... تنتظرك يا مغوار

ننتظر يالمحجوب منك تظهر

و اتصيح يا ثارات عمي الأكبر

يا سبب جسمه بالسيةف اتوذر

لا تنسه انصاب ... هذا الشاب ... شبه جدك المختار

بصوتي صحت و الكون يصرخ وياي

يبن الحسن شنهو البصر شنهو الراي

عمك رضيع انذبح ما ضاق الماي

عبدالله انصاب ... قلبه ذاب ... ما تدري اشصار اشصار

يبن الحسن و اشلون الك عين اتنام

عمتك مسبيه و خذوها للشام

ما عدها والي بس حراير و أيتام

يالصبرك ... طال و بهالحال ... ما نقبل كل أعذار

يا عذر عندك كل عذر ما مقبول

يبن الحسن علثار إنته المسئول

و اليوم أنشدك عن مريضك شتكَول

تنسه السجاد... من انقاد ... مسبي و من دار الدار