يمته يا فجر السعد فجرك يطر و يمته يا شمس الفرج بشروقها

يشرق اوياها النصر و أهل الكفر تمحي تاليها و تقطع إعروقها

يمته يشرق وجهك اليضوي الأرض يا إمامَ العصرها يالمنتظر

يمته تطلع سيدي و تحيي الفرض غيبتك طالت يبن سيد مضر

بينه يالمهدي الخصم طول و عرض يلعب و كل سا يراوينه الأمَر

و إحنه ما نرغب بعد طول العمر كون عدوانك نظل إبطوقها

إمطوقين و ملتف إعلينه العسر و المصايب كل دقيقه إنضوقها

يا هو غيرك نشتجي عنده المصاب من هو غيرك سيدي الصوبه نروح

كلها ضدنه و خيم إعلينه الضباب و لا نشاهد بالدرب شمعه تلوح

و الدرب مخطور غابات و ذئاب و تدري بالذيب إشكثر عنده طموح

لو تمكن من فريسه و بيه تمر و ما كو واحد عن مرامه إيعوقها

يهجم اعليها و لا منه تفر حيث يذهلها و لغاره إيسوقها

و إحنه يالمهدي الفريسه ابها الزمان طحنه بأنياب الوحوش الكاسره

إلحق اعلينه يمن بيك الأمان ضدنه كل أهل الكفر متظافره

طشرونه و صرنه غربه ابكل مجان و أغلقوا دور إبذكركم عامره

جانت و صارت مرابعها قفر و بيها بس ظلت تحن بل طوقها

و البساتين القبل بيها الثمر ماتت و يبست عليها إعثوقها

و الديار المنها أهلها إمشردين تمسي محزونه و مجدره أبوابها

و إنت يالقلبك على إديارك حزين هم إهيه امكدره اعله أحبابها

و إلها لو تسمع على إفراقك حنين ما نمت ساعه و نسيت إعتابها

جا ثرت وياي و إدموعك حمر تجري و الغصه الضقتها إتضوقها

و ما تنام الليل ثوره و تستمر لمن الدارك ترد إحقوقها

إستمر ويايه ثاير للأبد و لا تنام الليل يالعندك حرب

فوت إخذ حقك مثل حق الأسد و لا تظل عينك على أعظام الغرب

تربي بالك على الباري و إعتمد و إلتزم بيه و إخذ هذا الدرب

توصل الغايه و درج هذا الأمر طاعة الله و ينفتح صندوقها

و لو مشيت إبسجته و عندك صبر تربح الغايه السهرت إبشوقها

عاد أرد النوب بالمهدي أستغيث و أشجي همي و محنتي و جور الدهر

و الدهر وياي يا صاحب غثيث حكمه صارم سيدي و كله قهر

لا تخلينه إبحكم هذا الخبيث إعليك أقسم بالنبي سيد البشر

و منه خلصني يبن فارس بدر و هالمصايب لا أظل مشبوكها

و إنت عالم سيدي ابهذا العصر إشلون خسران الحقايق سوقها

و أشتجي لك سيدي اهموم القلب القطعت يالمنتظر سباحه

عسكرت ضدي و نوت تعلن حرب و خطت إبوسط الدليل الساحه

و آنه وحدي و ساكن إديار الغرب و للغريب إمن إنين تلفي الراحه

يبقه مهموم و عواصف بيه تجر و لا له لذه ابها الحياة إيروقها

و حيث يبقه إمدوهن و يضرب فكر إشلون يقضيها و يخيط إشقوقها