شيداوي قلبي المجروح...و بعيني شفتك مذبوح

شيطفي نار إمصابي

جني حاضر بالطفوف و أستمع صوت المصايب

صوت من قلب العقيله و هالقلب بالحزن ذايب

إتصيح يا مظلوم إلمن أشتكي و إلمن أعاتب

نار الخيم متوجره ...و إجسوم اهلنه إموذره

مو جثث جنها اعله الثره ...إبدور جنها إعله الترايب

جار الدهر يبن أمي ...شيطفي جمرة همي

لا مهجه عندي و لا روح...و بعيني شفتك مذبوح

شيطفي نار إمصابي

يا حسين إنهدم حيلي و حايره ابيا عين أنظرك

طاح بيتي الجان عالي من طحت من ظهر مهرك

ريت سيف القطع نحرك قطع نحري قبل نحرك

قلبي لمصابك منجرح ...ناديتك و دمعي يسح

يا ريت قبلك أنذبح...و أفدي عمري قبل عمرك

يبن أمي غابت روحي...إقعد و إسمع نوحي

حقه القلب من إينوح...و بعيني شفتك مذبوح

شيطفي نار إمصابي

من وقع بدر الهواشم وقع بيتي الجان عالي

و من وقع شبلك الأكبر ضيعت عزي و دلالي

و من طفوا شمعات جاسم رخص دمعي الجان غالي

ناديتك إبفيض الدمع...إقعد ومن عندي إستمع

يحسين أصعب كل وضع ...حين رد المهر خالي

مهرك رجع لخيامك...و إتلقته أيتامك

و النظر يمك مشبوح...و بعيني شفتك مذبوح

شيطفي نار إمصابي

من رجع مهرك يخويه و قاصد الصوب المخيم

يصهل ينادي الظليمه و الحزن عالعيله خيم

إتلقته الأيتام تصرخ بالدمع و الحزن و الهم

و نادته بدموع الصبر...خبرني بالله يالمهر

وين إتركت ابن الطهر...قال عفته إيموت بالدم

يم جثتك وداني...و إعله الجسد دلاني

جيتك و دمعي مسفوح...و بعيني شفتك مذبوح

شيطفي نار إمصابي

المصرعك يبن أمي جيت و شفت عالتربان جسمك

شلت من عالترب نحرك و إيدي متخضبه إبمك

صحت يالباري تقبل مني قربان ارد أسلمك

يا خويه و المدمع همل...متحيره و خاب الأمل

ما أدري أرجع للأهل...لو أظل يحسين يمك

متحيره يالوالي...منهو اليلم إعيالي

و إشلون أعوفك مطروح...و بعيني شفتك مذبوح

شيطفي نار إمصابي