يا ليل العاشر خلينه هالليله إنودع والينه

إتريض يا ليل العاشر ويانه إعله المدمع ساهر

ظل و لا تستعجل باجر تدري اشيضمر باجر لينه

خلينه اويه حسين الليله خل يتوادع ويه العيله

يشكي المظلوم و نشكي له عدنه أحزان و هم تدرينه

يا ليل الما نرغب فجره يا ريته الغاب و ما يطره

إتصبح ولياني إعله الغبره و إحنه الما يرحم يولينه

يا فجر المذبح لا تطلع خل إنودع حسين بمدمع

ملهوف اشمالك عالمصرع باجر بس تطلع تسبينه

يحسين إتريض يبن أمي بس هاي الليله إتظل يمي

إقعد خل أشكي لك همي خويه و نتذكر ماضينه

تذكر من نقعد يم جدنه و إنظل نشكي له اشما عدنه

من ذاك الوكت إتعاهدنه نتشارك باليجره اعلينه

يا بو اليمه و هم تتذكر من جنه انهود يم حيدر

ينظرنه ابلهفه و يتحسر يحضنه و تتهامل عينه