ودعتك ودعتك ...مغصوبه فارقتك...لو بيدي ما عفتك

عالغبره إموسد خليتك يا خويه إمخضب بدماك

يحسين و لو يوقع بيدي جا قضيت أيامي اوياك

لا قلبك يقدر ينساني و لا قلبي اليقدر ينساك

مشوني يالوالي...يمك ظل دلالي...لو بيدي ما عفتك

يحسين إشبيدي و لو بيدي ما عوفك لحظه ولا روح

رحت و ظلت يمك خويه ما تحمل فرقاك الروح

يا ضي عيني ابكثر إجروحك قلبي إختك مليان إجروح

صابوك و صابوني...ذبحوك و ذبحوني...لو بيدي ما عفتك

صديت و لن يبره إضعوني راسك يا خويه المرفوع

فوق إخدودك شافت عيني دم يجري ووياه إدموع

و لن صوتك ينشدني اشبيها يا زينب أطفالي إتلوع

يا خويه إيذكرونك...أطفالك يردونك...لو بيدي ما عفتك

يا خويه و شوصف لك حالي لمن مشوني ابيا حال

لو عثرت يحسين الناقه و من عدها إتطيح الأطفال

يا خويه و منهو إيصعدها ما ظلت وياي إرجال

محتاره بأيتامك...و آلامي و آلامك...لو بيدي ما عفتك

و يوم اللي طبيت الكوفه قام إيكت دمعي السجاب

و إتذكرت أيام الماضي و دار الوالد داحي الباب

و لمن شفت الدار ابعيني خدري إذكرته و قلبي إنصاب

مهضومه و مجروحه...و الراسك مشبوحه ...لو بيدي ما عفتك

يا خويه الموت إتمنيته يوم اللي طبيت الشام

آنه المستوره المحشومه و اعليه اتصد الظلام

و ايزيد الظالم يشتمني شوف اشراوتني الأيام