إلك نعرض يا زماني صوره من وادي النصايح و نحجي وياك ابصراحه و عن تجاربنه نصارح

إيدك إمخضبه إبدمنه ولا تظن إلها نصافح و للطفل ظلمك يشيبه و مبدأك للناس واضح

الغدر من شانك و طبعك ياللي ظلمك ما نسانه إحنه مثل الشمس إحنه الغيم ما يحجب ضوانه

إشما تزيد إغيوم جورك نورنه يزيد إبسمانه و الذي يصمد إبوجهك إسمع إشيهتف لسانه

من على منبر الحكمه إبوجهك الغدار صحنه ما تهمنه إسهام جورك إنت إنت و إحنه إحنه

و إحنه خدام إبو اليمه إبخدمته فزنه و نجحنه حسين عزنه حسين ودنه حسين بهواه إنشرحنه

و لو ردت تعرف الغايه و الهدف من هالخدامه الغايه للأجيال نشرح سنن دستور الإمامه

درب أبو السجاد درب الشرف و العز و الكرامه و الذي يبتعد عنه إيعيش بالذل و الندامه