منعوفك أبد يحسين خل كلهم يلومونه

روابط بيك تجمعنه علاقه من الأزل يحسين

مثل الجسم ويه الروح و مثل الجفن ويه العين

نشعر صرنه إحنه اوياك روح إنقسمت بجسمين

يحسين بهواك إنذوب ...يا أغله و أعز محبوب

و حبك بالقلب مكتوب

و لجلك يا حبيب الروح و نقبل لو يوذرونه

مثل حب المطر للقاع و حبيناك عالفطره

لون متنه و نرد إنعيش نرد إنموت ألف مره

و ألف مره يحرقونه و رماد إبريح نتذره

نرد و إردود نتجمع ...نقلك عالعشق نرجع

العواذل كلها خل تسمع

و لو ميت ألف موته إنموت و عنك ما يفصلونه

إبدورة عشق متواصل إنتقل حبك يبو السجاد

من الأجداد للأولاد إلنه و راح للأولاد

و كل ما تكثر اللوعات حبك بالقلب يزداد

حبيب و بيك مشغوفين ...تلوعنه ابهواك إسنين

و عن شوفتك محرومين

نريد إنواصلك و الناس و عن وصلك يحرمونه

و مرة عالمحب أدوار كل فتره يمر يدور

يجيك إبلهفه يتعناك و القبرك يريد يزور

حواجز ينصب إقباله و يمنعه الجاحد المغرور

أصدر أمر إلنه و قال ...اليجي يدفع ثمن و أموال

جاوبناه شنهو المال و بالدم بالنفس بالروح و للمحبوب يشرونه