طفله و يم قمرها جايه تتعذر ... دمعها من دمه عالوجنه يتقطر

سامحني يا عمي هالقلب ندمان ... مقطوع لساني ولا اشتكه لحزان

و لا قلت لك يا عمي هالثغر عطشان ... السبب آنه تطيح امقطع الذرعان

عله الغبره تطيح و جسمك اتوذر

السبب آنه أشوفك عالترب مرمي ... السهم لعيونك امطفيها يا عمي

ياريت الهمصيبه مولدتني أمي ... و لا أبقه أحير ابهمك و همي

خلاني الدهر من صغري أتحير

اشدهاني منك اطلبت العذب و الجود ... أنه ادموعي السبب من صابك العامود

يا عمي ما جنت أدري بعد متعود ... و ابروحك يا غالي اعله العطاشه اتجود

ترحل و القلب من عدها يتفطر

سكت ريت اللسان و لا نطق بإسمك ... و لا جنت انتخيت ابزودك و عزمك

ياريت ارجولي مقطوعه ولا يمك ... وقفت ولا جنت حلفتك بإمك

اشيصيرن لو جنت يا روحي أتصبر

يا ريت اعيوني تعمه و ينسفك دمها ... ولا قلت لك يا عمي دمعتي إرحمها

ولا شفت الحرم متحيره بهمها ... ولا قلت لك خواتك عمي كلمها

شسوي و الجمر بطفالك اتفجر

مسحت ادموعي و اتصيح الأمل هالروح ... عمي و ما يخليني ابقلب مجروح

تاليها لقيتك عالترب مطروح ... السبب آنه امن أشوفك يا قمر مذبوح

من دم النحر يا عمي تتعفر

ابنفس عيني اللي بيها اكسرت الك قلبك ... يا عمي شفتك و سهم العده ايصوبك

و دم اللي نزف من جفك ايخطبك ... ششوف بها العيون الهايمه حبك

هم أقدر أشوفك دامي تتصور

يا من بإسمك دليلي مغرم و هايم ... اشلون أقدر أشوفك عالنهر نايم

اويا عذر الأقدم و القلب نادم ... هم عذري يردك يا قمر هاشم

و من عطرك يا عمي الدنيه تتعطر

عسه اعيوني العمه ولا شافت الرايه ... ولا جبت الصغار التنحب اويايه

ولا ردت النهر ترويني من مايه ... أنه الذكرتك بعهدك يا رجوايه

ساعه اللي طلبتك بيها تتذكر

يا ريت ابكترك اليوم انحفر قبري ... بعد عمرك يا ضي عيني شلي ابعمري

تظل فرقاك نار و تحرق ابصدري ... السبب آنه يا عمي ابروحتك أدري

قطع نحري ياريت اللي حز إلك منحر