يا حيدر حبك إيماني حبك بيه آدم وصاني

حبك مو هاليوم إعرفته يا حيدر من زغري إعشقته

لا فارقني و لا فارقته و لا أنساه و لا ينساني

كل فجريه باب الرحمه قرآن الحب قلبي يختمه

و لو رايد هذا الحب ختمه يم بابك قنبر يلقاني

إنت الباء الما تتزور إنت النقطه الما تتفسر

آيات إلقيتك يا حيدر إثلميه و تسعه إبقرآني

إنت البيك الدين إتخلد إنت البيك الله إتوحد

لو قالوا در إنت و عسجد أصرخ لا جوهر رباني

إسمك بليالي الحب يضوي و يتهمنه من ينكره البدوي

إتقدم إلمن طير المشوي و من أصبح هارون الثاني

إنت الرايه و إنت القمه إنت السيف و إنت الرحمه

الما حبك خل ينشد أمه عن نسله الزاني ابن الزاني

حبك زارع وردة وده إبقلب الما بيه غيض إو عقده

رادوا تذبل هاي الورده وشقد عطشها المرواني

حبك هذا أرعب كل باغي شاف اليرضع بيه يناغي

و جم حجاج الراد و طاغي بالسيف إيغير عنواني

يا كوكب ما غيم إيحجبه من مثلك حب الله حبه

لو ما حرمة هاي الكعبه إتصير إنت القبله الوجداني

بيت الطين الجنت إتسكنه واحة نور إتحول إلنه

مرقد لو قطعه من الجنه أدخلها إبحبي و إيماني

ذهب التيجان الذليته عتبت أبوابك خليته

برغيفين إشعير إشريته و غيرك لا شاري و لا باني

حبك معبد بيه أتعبد و لو عنك جسمي إبعيد أبعد

روحي إتظل يمك بالمرقد و إهناك أنزع ثوب أحزاني

لو جسمي الموت إتعنى له ليك ينقلوه النقاله

إنت التوقف بستقباله و بروضك تدفن جثماني

بأرضك يا حيدر من أثوي من كوثر جفينك أروي

ألقى قبري إبحبك يضوي و ما غيرك يطرق بيباني

آمنت ابحبك يا حيدر يمحي لي اشما كاتب منكر

و إلساني إقباله لو يقصر هالضيف إتلقى جيراني