إبشوق إجينه ...يا علينه يا ولينه

كلمن اعله إجناح شوقه معتني يا حيدره

و كل محب محبوبه تدري إبنظره يجبر خاطره

اوياك طول إنتظاري و موعدك أتنطره

طفل قلبي و ما فطمته إيريدك و شيصبره

و كل محب محسوبه ...لهفته المحبوبه

و إعتنينه ...يا علينه يا ولينه

موعد و لحظاته مرت لحظه من مره أشد

و إنت المربينه تدري اوياك ما نخلف عهد

يا هله ابهاالبشره إلنه الجابها طير السعد

قلي يا مولود مثلك مكه صارت له مهد

بالوفه إتناغي له ...مكه و إتلولي

أم حنينه ...يا علينه يا ولينه

جبنه كل إجروح حبنه البينه خلاها الزمن

انريد بالميلاد تشفه ابجيتك يا با الحسن

و على حبك يا ولينه شفنه أنواع الفتن

لجن إنعيش ابسعاده اوياك غصبن عالمحن

إنهني جينه اولادك ...شيعتك و أحفادك

تدري بينه ...يا علينه يا ولينه

هاي فرحة كل شريف و كل وفي و حر و أبي

يا حبيبي الما يحبك كفر بالله و النبي

و إسمك اعله إبتوت قلبي رمز ديني و مذهبي

نعمة الحق و الولايه امن الله هذا مطلبي

الباري خير إنطانه ...غصبن إعله إعدانه

امعاهدينه...يا علينه يا ولينه

يا قمر تزهي ابسمانه و تظل تضوي ما تغيب

آنه مو بيدي أحبك شنهو هالسر العجيب

آنه حسيت بمحبتك ويه رشفات الحليب

و من فتحت اعيوني لني اوياك محبوب و حبيب

و لني مسلم شيعي ...يا علي و توقيعي

إبدم مضينه...يا علينه يا ولينه