محفوره عالضلعين... آية جلالك

شلتك نبض بين الوريد... تدريني ما غيرك اريد

يغالي ... وكل خيالي... والشعور وياك

اضمك... وعلى رسمك... لهفتي بطرواك

حياتي... وامنياتي ... فرحتي بملقاك

افكر ... من ادور... بالنبض القاك

واكثر ... شوقي يكبر... واتسامر بمعناك

نامت على خد الغرام ... شامة عشق تضوي هيام

وعلى الوجن شطين ... شوقي ودلالك

اسافر ... بالمشاعر ... والعشق جنحان

واجيلك... معتني لك ... وانت بالشريان

من اسمك... ثغري ضمك... ضمة الولهان

احبك... وعلى حبك... هايم وسهران

ضامي... كل غرامي... حبك دوا العطشان

انت النبع وانت الوجود... حبك يظل سر الخلود

مثلك اجيبه منين ... محد مثالك

زماني... لو رماني... عاندت دنياي

اقصدك... وانه عبدك ... بس الك منواي

اطلبك... وعلى دربك ... سيدي عناي

منك... القى منَّك ... شيمتك وفّاي

تسرح ... روحي تفرح... فرحة شجر بالماي

وشما يراويني الزمان... يحسين الاقيك الامان

والرحمة بالكونين ... اول خصالك

يشمسي... ولمن امسي ... عيني بيك تشوف

نهاري... بيه اداري... قلبي الملهوف

وآمل ... يمك انزل ... واعتنيك زحوف

جروحي ... تبقى روحي... بالحنين تطوف

وانته... يالعشقته... كل يوم اشوفه طيوف

بنار الهجر شمعة واذوب... عن حبك ابدا ما اتوب

مشتاق الك يحسين... واطلب وصالك