و إحنه اشما علينه إذنوب مغفوره ابشفاعتها

ساعة شرف بالمحشر طالع سر مضامنها

صوت امن العرش يهتف بين الناس يعلنها

أم الحسن خلي اتجوز غضوا ابصاركم عنها

و اتلبي النداء الناس...و كلها تخمد النفاس

موقف يدخل الإحساس

و الما عرف خل يعرف عند الله كرامتها

ضجه و البكاء يصير و تهتز ساحة المحشر

ابمنظر حزن و بالآلام لمن فاطمه تظهر

من تنشر قميص حسين مصبوغ ابدمه المنحر

و تندب خالق القدره...ليش إبني إنقطع نحره

و سلبوا و إنهشم صدره

و دمعة كل نبي و مرسل تجري ويه دمعتها

و موقف يجعل الأملاك كلها اتعاين ابحيره

و هذا الموقف ايبيم معنه الوفه و تفسيره

لمن ترفع الزهره بديها اجفوف ابو الغيره

و بحسره و دموع العين...اتصيح ام الحسن و حسين

شنهي ذنب هالجفين

اتوافي أم البنين اتريد البل الأولاد وافتها

و رب المرحمه اينادي اشتطلب فاطمه الزهره

كل مطلب تريده ايصير و خلي اتكون مبتشره

تقله كلمن ايحبني اريده ينشرح صدره

وشعنده ذنب مغفور... وتعبه ابخدمته مذخور

و للجنه يطب مسرور

و ما نبجي عليها اشلون و انوح المصيبتها

نبجي و نلطم اعليها طول العمر ليل إنهار

صوب كل ضلع بينه ضلع الصوبه المسمار

نقسم قسم بالباري لو عدها قبر ينزار

و نتعنه القبرها ازحوف... و بلطم الصدور إنطوف

و انخلي الأعادي اتشوف

يا زهراء كلنه انصيح و انبين ظلامتها

فوق ابيوتنه تبقه مرفوعه لعلام السود

تقله ابكل قلب شيعي للزهره قبر موجود

و ما نقطع بواجينه لمن يظهر الموعود

وانسمعه يصيح الثار... من الهجموا اعله الدار

و احنه اويه الإمام أنصار

يا مظلومه يا زهراء شيعة علي صرختها