حنيت .... ونيت .... دم و دمع هليت

يبني يلكبر زهرتك بعيوني أتمثلها

يرويها دمعتي و حسبت تكبر و أعيش ابظلها

ما جنت أدري كربله هجرانك ايذبلها

يالعفتها .... و فاركتها

و ذبلتها .... و نثرتها

و زهرة حياتك عالترب مرميه وياك

يا مالي يا بني ساهرت راح السهر ذاك

خيبني .... خيبني....دهري الشوم خيبني

حنيت .... ونيت .... دم و دمع هليت

يبني يلكبر يالجنت خيمه و كرامه و عفه

تاليها منك أنحرم يا ألف حيف ووسفه

يا شمعتي الما حسبت عند الشدايد تطفه

هذا همي .... و قلبي مدمي

و منه يمي .... و انت مرمي

يا بسمتي و يا فرحتي و يا سلوة الروح

ابيا عين أشوفك منصرع عالغبره مذبوح

ذوبني.... ذوبني .... و جمر النوح ذوبني

حنيت .... ونيت .... دم و دمع هليت

يوليدي صارت فرحتي همي و نحيب و مدمع

ليش ابدماك اتغسلت و الجفن داري المصرع

يا اللي اقطعك سيف الأجل قلبي ابهواك اتقطع

جفني ساهر .... فكري حاير

قلبي صابر .... جبدي شاجر

جمرة مصابك بالجبد تتوجر ابنار

هذا الجرالي ابغيبتك و هذا الذي صار

صوبني .... صوبني .... سهم النوح صوبني

حنيت .... ونيت .... دم و دمع هليت

اشما تجري دمعات الجفن نار القلب تتوجر

ما أقدر أتحمل صبر لمصيبتك ما أقدر

اذخرتك الساعات الشدد راح الذخر يا الأكبر

ذبني دهري .... و منه عندي

و هذا ذخري .... ادمومه تجري

مذعوره نجمات السمه ابغيبتك يهلال

و العالم العلوي انفجع هاك اسمع اشقال

لوعني .... لوعني .... هذا الحال لوعني

حنيت .... ونيت .... دم و دمع هليت