بكل بيت.. خطيت.. إسمك يا ثار الله

بالخواطر - بالضماير - بالمشاعر

إسمك يا ثار الله

من بدت ساعة حياتي وإبتدت لحظات عمري

شفتك تعيش بكياني حُبك إبشرياني يجري

عالأرض خطوة على خطوة محبتك ويايه تسري

ماغبت عن فكري لحظة بكل وكت إنت على فكري

حبيت - حسيت - أگرب من ضي عيناي

أهواك - وألگاك - بكل لحظة تعيش وياي

بيك أفاخر - و إنت صاير - بالمشاعر

إسمك يا ثار الله

جلت الخالق صفاته إلشيدت بنيان مجدك

حبك إتملك شعوري ومهجتي لاذت بسدك

إنت مجمل كل حياتي ولا حياة بغير ودك

وإنت مركز للمشاعر ملتقى الأرواح عندك

مگطوع - مرفوع - راسك يبن الكرار

هالراس - للناس - كوكب يهدي الأبصار

نوره زاهر - للبصاير - بالمشاعر

إسمك يا ثار الله

إسمك بطارف لساني ورسمك بدلالي غافي

المحكمة بحبك خذوني وآنه بأحضان المنافي

وبقلم إيمان گلبي وقعت فوگ إعترافي

وأعترف لو ما وجودك ما نزل وحي القوافي

أفكار - وأشعار - منك وحي الإلهام

وأبيات - هيهات - توصفك يا بدر التام

اغلى ثاير - دمه فاير - بالمشاعر

إسمك يا ثار الله

سرك السر الإلهي وما گدر واحد يعرفه

أنظر الشمس بجبينك لو شمس دنيايه تغفى

حبك تملك شعوري وبالشعر أعجز أوصفه

إنت إلهام القوافي وللشعر إسمك يشرفه

يكفيك - باريك - كاتب إسمك عاللوح

محبوب - مكتوب - حبك بأعماق الروح

بيك أجاهر - وإنت حاضر - بالمشاعر

إسمك يا ثار الله

لا بشر يگدر يوصفك و لا ملك يعرف صفاتك

وصارم إلي حز وريدك فتح بوابة حياتك

تميزت عالناس كلها بمعجزة من معجزاتك

إنت أول بشر أصبح مولدك ساعة مماتك

للثار - أنهار - تتفايض من كل عين

مظلوم - يا يوم - يحصل ثارك يحسين

گلبي شاجر - فكري حاير - بالمشاعر

إسمك يا ثار الله