عالمهد روحي اتلوب .... يبني آه يبني

يا فرحت عمري الما دامت يا شهقة قلبي المجروح

ضميتك ما بين اعيوني يا طيف العايش بالروح

بيا عين أنظر مهدك خالي اشلون أنظر نحرك مذبوح

شفت النحر مخضوب .... يبني آه يبني

وين أطلع اليا صوب .... يبني آه يبني

يا دمعة عيني الما تنشف يا مذبوح ابسهم البين

لو أدري اتروح و ما ترجع جان اسقيتك ماي العين

مليت الدنيه و ما بيها وين أطلع و أتوجه وين

و هالأمر ما محسوب .... يبني آه يبني

و سهم العده اشمطلوب .... يبني آه يبني

عند مهدك سهرانه اعيوني و ناديت بدمعي الهمال

يا عطشان اقعد يوليدي هاك اشرب ماي الدلال

بالطف قطعوا زهرة عمرك و انقطعت كل الآمال

و جمر الحزن منشوب .... يبني آه يبني

اشلون القلب ميذوب .... يبني آه يبني

يا عبدالله و أصعب موقف موقف خله الروح اتحوم

كل ساعه أنسه و انظر مهدك و أتذكر ذبحوك القوم

و اردوود أنسه و أنظر مهدك لن خالي امجانك هاليوم

هذا العلي مكتوب .... يبني آه يبني

و دمع الجفن مسجوب .... يبني آه يبني

مهمومه و ناديت بإسمك يبني و يا زهرة دنياي

عطشان و ذبحوك إقبالي أشلون أشرب و أتهنه ابماي

ما تخمد نارك يوليدي و جمراتك تسعر بحشاي

صوتي ابدمع مصحوب .... يبني آه يبني

أحمل صبر جم دوب .... يبني آه يبني

احترقت كل صفحات اسنيني و راحت ويه الريح الهاب

ظليت أصرخ يا عبد الله امصابك يابني أشلون امصاب

قبلك ريت اتصوب نحري ولا اشوفن نحرك ينصاب

و دمك نسج لك ثوب .... يبني آه يبني

و ثوب العمر مسلوب .... يبني آه يبني

إنته اعيوني الأنظر بيها يا عبد الله أشلون أنساك

أحمل كل اهموم الدنيه و لا ساعه اتمر من فرقاك

و بساعة دفنك يوليدي دفنوا روح أمك وياك

حاربني دهري النوب .... يبني آه يبني

و لجلك قطعت ادروب .... يبني آه يبني