ليل الفراگ بعد هيهات أنامه.... لمن الراح يرد ليه بسلامه

تركني العندي غالي.... بچه الطير اعله حالي

ليل الفراگ بعد هيهات أنامه

عيوني من راحو بجت ناظرها....والوسن ساعة وحدة ما مرها

روحي ولهانه بيش اصبرها....من مشوا عنها البعد حيرها

ما رجع مرسول حتى يخبرها....بس أنين الدار كسر خاطرها

وين اليروح يوصلهم عتابي تسكن جروح سهر ليلي وعذابي

طفت شمعة دلالي.... بچه الطير اعله حالي

طفله عافوني بدمعتي التجري....سافر اوياهم من مشوا صبري

نار ملتهبة حسرتي بصدري....وين سفرتهم ما چنت أدري

ويا الموادع ودعت عمري....بيد ناعي الموت سلمت أمري

طفله بالدار انا الوحدي وعليله.... غير الدموع بعد شملك وسيله

بقيت أحسب ليالي ....بچه الطير اعله حالي

والله لو أدري بيهم يعودون....جاگلت صبري وانتظاري يهون

والصدى يگلي بعد ما يلفون ....اهلچ الراحوا الكربلا يردون

صحت تانوني من سرى المضعون....ما بگت عندي للدموع عيون

بين الهموم تركتوني وحيده ....عمري شيفيد بعد لمن اريده

يخلاني شبگى لي.... بچه الطير اعله حالي

يا هوى المنهم بالنسايم هاب....بالله خبرني بين الاسباب

ساعة الهبيت جرح قلبي طاب....نشفت دمعي الكل وقت سجاب

گلي هم مريت من سما الاحباب....هم خبر عندك عن هلي الاطياب

يا هوى الهاب اظن تعرف مرامي.... لمن تعود تبلغهم سلامي

على احبابي سؤالي.... بچه الطير اعله حالي

عني من ابعد صوت حاديكم....وبضعنكم چان يحدي ناعيكم

بعد شتأمل لو اتانيكم....لو يصح بيدي اعتني ليكم

حتى اشوف اشصار وش جرى عليكم....دهري يحبابي هم يرد بيكم

انثر ورود دربكم لو اجيتو ....روحي للموت سرت يوم السريتو

دمع عيني حلالي.... بچه الطير اعله حالي

صحت وين الگه الگلبه طيب وين...عوض عني يروح ينخى بويا حسين

فاطمة يگله على فراش البين....كل بدنها جروح لا جرح واثنين

بگت محتارة تصفگ الچفين...لو يحل موتي من يغمض العين

انظر الدار وحشة خليه ....عگب الاحباب هلا بجيت المنيه

على مصاب الجرى لي.... بچه الطير اعله حالي