آنا بيوم ولدتني أمي.... حب حسين يسري بدمي

والرايد يكفرني.... ما يگدر يغيرني .... حب حسين يسري بدمي

هذا الحب ناتج عن فطرة يوم الصرت وصار اوياي

الله يجازي أمي الرضعتني حب اتملك كل اعضاي

من زغري وتخنگني العبرة واتحسر من اشرب ماي

ما عندي لسان وحتى اسأل شنهي السر يا ناس بهاي

أسأل ليش تهمل عيني.... شرب الماي ما يرويني

عاشگ وانا ما ادري.... رابي وياي من زغري.... حب حسين يسري بدمي

وكبرت وگمت اعرف كل شي واتوضح لعيوني النور

لكن ظل سر محيرني يوم العاشر من عاشور

هذا اليوم اشما مر بيه دم البشريان يفور

معناها حسين الحبيته راسه بسيف الشر مطبور

والتعبير عن احساسي.... يعني يصير من دم راسي

لو بدماي واسيته.... عن اخلاص حبيته.... حب حسين يسري بدمي

كل ما أكبر يكبر حبي وازاد ايمان واصرار

لمن خط حسين اعرفته من عندي يريد الايثار

شديت احزامي بإخلاصي رحت ويا الراحو زوار

گاصد مشاي المحبوبي واشلون اتردني الاشرار

صحت بصوت لو ذبحوني .... عن حسين ميمنعوني

روحي بچفي شايلها.... اريد الگبره اوصلها.... حب حسين يسري بدمي

ركزت بناظر وجداني شفت حسين يمثل ديني

ومن يگدر يا ناس يظلني حبه الدرب يهديني

جربني وأيس من عندي شيطان النفس اليغويني

يگلي اشلون الكرسي الزائل والمال الينفذ يغريني

اي والله ثابت عهدي غير حسين انا اشعندي

الغيره ما أمد ايدي.... يبقي بإسمه تغريدي.... حب حسين يسري بدمي

تاج الخدمه البيه اتنومس بين الناس انطاني الرفعه

والحاقد خل ينزع جلدي بس لا هذا التاج ينزعه

والچف البيه اضرب صدري والعين التهمل بالدمعه

باچر الگاهن جدامي يضون گبري يصيرن شمعه

اشلون ايطول گلي احسابي.... حب حسين هو اكتابي

منكر ما يحاسبي.... يا نار التعذبني .... حب حسين يسري بدمي

وشگال الصادق يالشيعي فكرك يمي وركز واسمع

مركب حب حسين يوصفه من كل مركب هو الاوسع

وحسين مقدم للباري يوم العاشر حتى اليرضع

والباري مخوله شمايطلب عند المحشر هو اليشفع

للخدام هاي ابشاره.... كل من طاف گبره وزاره

ويحضره بوكت موته.... كل مخلص رفع صوته.... حب حسين يسري بدمي