هاشم ابيا حاله ...من جور الأيام

هالصوت يتعاله ...بإسم النبي و آله

من جور الأيام

من دمع عيني و حسرتي المرسومه

امصايب الهادي و عترته المظلومه

قلب المحب إلمن يوجه لومه

أرواح إلنه اعله النبي مالومه

لمن قضه الهادي ...زادت الآلام

محد حضر يمه ...و نعتب عله الأمه

من جور الأيام

شيعنه نعش المصطفه بالعبره

و النوب داهمنه مصاب الزهره

ما ننسه ضلع أم الحسين و كسره

كسر الضلع عالمحب يصعب أمره

جرح القلب دامي ...لا تظن يلتام

لمصيبة الزهره ...خل نسجب العبره

من جور الأيام

و ثالث مصاب امصاب ما مثله امصاب

إلمن نناشد إلمن انوجه اعتاب

راس الوصي ابسيف ابن ملجم ينصاب

للحشر تجري ادموعنه الداحي الباب

و حيدر قضه نحبه ...و شاءت الأحكام

لمن قضه حيدر ...و هالأمه تتحسر

من جور الأيام

و رابع مصاب امصاب الصاب الأمه

جبد الحسن ذايب ابجمرة سمه

و خامس مصاب امصاب عود اليمه

ابيا ذنب نحر حسين يسفح دمه

ظلت عقب عينه ...بس حرم و أيتام

و اخيامه ملهوبه ...و الحرم مصيوبه

من جور الأيام

و زين العباد انهدم بالطف حيله

محتار ما بين الجثث و العيله

دمعة الباقر هالوضع تسجيله

و حزن أبو الصادق يا جبال اتشيله

و الأمه من بعده ...عاشت بالأوهام

لمصيبة الباقر ...قلب المحب صابر

من جور الأيام

جعفر الصادق روحه بالهم اتحوم

قلبه حمل من بني العباس اهموم

استارث مصابه الكاظم ابنه المسموم

ما ننسه يوم الكاظم الهذا اليوم

و إبنه الرضه اجروحه ...لا تظن تلتام

جم نايبه ابقلبه ...و اتحمل الغربه

من جور الأيام

و إبنه الجواد امصابه لا تظن يهون

انسم ابغدر من فعل بنت المأمون

جسمه ثلثتيام أصبح مرهون

مرمي ابسطح الدار ظل ما مدفون

و شبله علي الهادي ...ظل صابر أعوام

و العسكري من بعده ...هالسم فطر جبده

من جور الأيام

و الأمه ظلت تنتظر غايبها

تنتظره يكشف محنة امصيبتها

سهم المصاب ابغيبته صوبها

و الدهر بهموم و مصايب ذبها

تصرخ يا غايبنه ...يا شبل الأكرام

للطلعه نتأمل ...جم دوب نتحمل

من جور الأيام