يهل تنشد على مسلم جتل و إنجتل بالحومه

و إنشدني عله أطفاله الراحت جتل مظلومه

و مسلم بالعزم و السيف خله الكوفه محتاره

صدق يصعب جتل مسلم و تسعر بالقلب ناره

نطفي النار لو قلنه أخذ قبل الجتل ثاره

و ايحق النحب و النوح...عله أطفاله الفدوا بالروح

طفل فوق الطفل مذبوح

بريه امن الجتل لاجن...ابسيف الظلم محكومه

انجتل مسلم و ظلت له يتيمه و اليتامه اثنين

يتامه و مو يتامه انقول و جيه حيف الوجود حسين

و سلمهم لعد زينب و دارتهم ابماي العين

ابماي العين دارتهم...و عن اليتم سلتهم

و نستهم مصيبتهم

و لا جن عقب عين حسين...ذكروا مسلم و يومه

عقب مسلم و عين حسين تدري بلطفال اشصار

و هجت من المخيم من جور النهب و النار

و ظلت بالبراري اتحوم تصبح دار تمسي دار

و أهل الغدر لزموهم...و لبن إزياد ودوهم

صدر أمره يسجنوهم

و إلها بالسجن حنه ...و إلها اقلوب مالومه

و جني بالسجن حاضر و للأطفال أمثلها

و جنه الخوف ماخذها و هم اليتم نحلها

واحد شابك الثاني و تتراجف مفاصلها

و ايقله يخويه اشلون...ما تغمض لخوك اعيون

و صد له أمرنه ايهون

و لو ساعة فرج تقرب ...تزيل السجن و اهمومه

و طفت نار بلواها ابذكر طاعة الرحمان

و هذا الراكع و ساجد و ذاك ايؤتل القرآن

و السجان شاهدهم و كسروا خاطر السجان

إنتوا امن انين شاهدهم...و اعرف سيد البشر جدهم

جتيل الكوفه والدهم

و من السجن طلعهم ...و باح الجدهم ادمومه

على جذم الخطر ساروا وين الوجه ما يدرون

النهار ابجهف يقضونه و لو أمسه المسه يمشون

و مطرودين مطلوبين و امن الموت يتجفلون

منيتهم حدت بيهم...عله الحارث تدليهم

شاهدتهم دنت ليهم

و ابوجه الرضه اتلقوا ...شهادتهم المقسومه

و مسلم عف عن ابن ازياد لجل هاني و شرف داره

و شوف الحارث المجرم ذبح عالطمع خطاره

ذب واحد عله الثاني و بيهم فتك بتاره

و انشدني ابدمع همال...و شنهي حرجة الأطفال

و لجل الجائزة القتال

ووده الرؤوس لبن الرؤوس...تلقه إهناك محتومه