علي السجاد ابلسانه .... الثورته صدر بيانه

ثورة احسين العظيمه نهضت بأصعب مهمه

منحره غده فكرها و ارتوت بوداج دمه

و هذي دم الرساله البيه يزيد انهار حكمه

ثبتت الدين و كيانه .... الثورته صدر بيانه

أرخ ابدمه الحقائق و كل مضامين العداله

الحبر أصبح دم وريده و القلم سيف الرساله

و أبو الباقر بالخطابه فضح أرباب الضلاله

من قصر ابن مرجانه .... الثورته صدر بيانه

ابجتل أبو اليمه اميه فكرة تربح الجوله

و تبني الها أكبر مواقع و عالجماجم تبني دوله

ما درت هالنهضه تمت و بيرغ الثوره تعله

صوته من أطلق عنانه .... الثورته صدر بيانه

مثل موسه من تكلم ويه قومه العصت أمره

و موسه لاجن ما تكبل ولا مشه الامه يسره

رغم قيد الطاغي صوته مرتفع بأرجاء قصره

من عقر داره و مجانه .... الثورته صدر بيانه

قالوا اعليهم خوارج و هم من أشرف قبيله

ابخطبته السجاد وضح هوه و الحره العقيله

احنه هل بيت الرساله و النه ترجع كل فضيله

ظن يزيد ابها الإهانه .... الثورته صدر بيانه

من دخل للشام حاير اتفجرت ثورة كلامه

أحد من السيف صارت و بيها وضح كل ظلامه

احنه هل بيت النبوه الباري خصنه بالإمامه

خسر طاغيهم رهانه .... الثورته صدر بيانه

راهب آل بيت شاهد باليسر شته المصايب

الكوفه و الشام و سبيها ابقلبه حفرتها النوايب

و قرب منه الأجل تالي و بالسموم اقليبه ذايب

و ابقطع جبد الديانه .... الثورته صدر بيانه

الباقر ابنه اتعنه يمه و غسله ابدمع الرزيه

و هوه شاهد جده بالطف امغسل ابدم المنيه

و جسمه عالتربان عاري امجفن ابداري الوطيه

اموذر ابسيف الخيانه .... الثورته صدر بيانه