سادس بدر مفقود .... شفنه الليالي السود

من غابت أنواره

جاوبنه يالموعود .... امن الغيبه يمته اتعود

و اتطالب ابثاره .... و اتطالب ابثاره

رساله من جفن ضيم و دمع ينبع .... إلك يبن الحسن أكتبها بالمدمع

جم لوعه و مصيبه ابضامرك تجمع .... لون قلبك قلب أيوب هم يجزع

عليك أقسم قسم يا الغايب و تسمع .... ابكسر ضلع الوديعه و طبرة الأنزع

بالمجتبه المسموم .... و بجدك المظلوم ...و بأهله و انصاره

باليسروها القوم .... تعلن حرب و اتقوم

و اتطالب ابثاره .... و اتطالب ابثاره

اشتنسه يا جرح يا طعنه يا طبره .... و مصايبكم تحرك الميت ابقبره

اشتنسه امن الدهر ضلع أمك الزهره .... لو طبرة علي التركت ألف حسره

لو تنسه الحسن و ابجبدته الجمره .... لو جسم التغسل من دمه نحره

ريتك جنت و اتشوف .... عسكر إجاه اصفوف...و امجرد أشفاره

يا البلصبر موصوف .... للغيبه يمته اتعوف

و اتطالب ابثاره .... و اتطالب ابثاره

الوعد يا يوم يبن العسكري و تظهر .... و ترسانة حرب يلمهدي تتصدر

الك ثارات غير الضلع لمكسر .... و غير الطبره ذيج الصوبت حيدر

و ثار الحسن و احسين الذي اتوذر .... و ثار اللي مشى ويه العيله و اتيسر

من لوعت السجاد .... نار القلب تزداد...ما ينخمد ناره

عين الله بالمرصاد .... لا بد يجي الميعاد

و اتطالب ابثاره .... و اتطالب ابثاره

عقب ماذبحوا المظلوم و أعوانه .... تهاوت بالمصارع جثث فتيانه

هجم آل أميه بفزع فرسانه .... و مضاربكم حرقها بلهب نيرانه

و السجاد ينظر نار صيوانه .... غذت تسعر مثل جمرات أحزانه

قلب العليل احتار .... يحمل جمر يا نار...من شنو الغاره

جدك يريد الثار .... و اتجرد البتار

و اتطالب ابثاره .... و اتطالب ابثاره

يشوف احسين دامي اعله الأرض تركوه .... مثل ضلع أمه صدره بكربله هشموه

و السجاد جدك ممتحن خلوه .... عليل بنار و اخيول و زلم حاطوه

مثل ما راس ابوه اعله الرمح شالوه .... عله انياق اليسر جدك علي حملوه

عل الغبره عاف ابدور .... محزوزه منها انحور...و العايله إيساره

دم جدك المهدور .... يالمهدي يمتى اتثور

و اتطالب ابثاره .... و اتطالب ابثاره

بيسر مشوه ويه العيله و الايتام .... حمل لوعة الكوفه و نايبات الشام

مرت عالعليل أصعب و أشد آيام .... أيام اليسر كل يوم جان ابعام

عقب ذيج المصيبه امصيبة الأكرام .... رجع لأرض المدينه بفاجعه و آلام

امن الدنيه شاف الويل .... ما عنده مهجه و حيل...و اندهلت أفكاره

يا ساعه يقضي الليل .... تسرج ظهور الخيل

و اتطالب ابثاره .... و اتطالب ابثاره

أبد مالوم جفني لو تطافح دم .... عله امصاب العليل اللي قضه بالسم

انغذر مسموم و بقلبه مرار الهم .... و حته قبره يبن العسكري اتهدم

لونك تظهر و تكشف سحاب الغم .... تروح اتشوف قبره موحش و أظلم

هذا الأمر مقسوم .... حتى القبر مهدوم...بس ظلت آثاره

يا حجة القيوم .... يمته الفرج يا يوم

و اتطالب ابثاره .... و اتطالب ابثاره