ما أنسه عاشور ذبحوا زلمنه.... حرقوا خيمنه

سبي الحرم و الأطفال ....ما ينمسح عن البال

حرقوا خيمنه

عليل آنة و زماني لروحي ألمَّها .... عواميد الصبر بحشاي هدَّمها

شلون أنسى مصيبة كربلاء و همها .... اشأنسى رقاب أهلنا اللي نزف دمها

لو أنسى اليتامى الحرقوا خيمها .... لو أنسى الحَرَم ما ظل ولي يمها

من مهجتي يفيض دمع الحراير ....دم المناحر دم المناحر.... ينزف

دم الذي بالطف سال.... ما ينمسح عن البال

حرقوا خيمنه

عوَّدني زماني على الحزن و النوح .... و مشاهد كربلاء عن الفكر متروح

بقلبي شكثر طبرات و طعن و جروح .... جم لوعة بعد تقدر تشيل الروح

اخوية الأكبر قبالي وقع مذبوح .... و بعيني شفت دم النحر مسفوح

للأكبر امصاب ما تطفه ناره ....دمعي ايتجاره دمعي ايتجاره.... الفقده

فقده انرسم بالدلال ....ما ينمسح عن البال

حرقوا خيمنه

شكثر قوم آل أمية لروحي فجعوها ....و دمعتي بزفة العريس أجروها

بدال شموع عرسه رماح شالوها .... و من دم الوريد جفوفه حنوها

بعيني شاهدت أوصاله وذروها .... جثة ابن عمي بدمع غسلوها

ما أنسه جسّام و اشأنسه منه ....بالدم تحنه بالدم تحنه ....جفه

بعيني شفت ذاك الحال.... ما ينمسح عن البال

حرقوا خيمنه

ما شافت عيوني على الترب ابدان .... أشوف ابدور و تهاوت على التربان

رِحِت صوب الشريعة امطوَّق بأحزان .... أتخطه على همي و أمشي عالنيران

شفت يم النهر عمي قمر عدنان .... صريع بلا راس امقطَّع الذرعان

عالشاطي عباس و اجفوفه يمه....عالغبره جسمه عالغبره جسمه....اموذر

افراق القمر مهما طال.... ما ينمسح عن البال

حرقوا خيمنه

براكين الحزن بحشاي مستعره....تتطفه جمره تتناثر ألف جمره

و اللي خله عيني تهمل العبره....شفت عبدالله ضامي ابحسرة القطره

انذبح عطشان قطعوا بالسهم نحره....و دمه ظل يصب من منحره الصدره

العبدالله ونيت و ابقلبي ناري....ليلي و نهاري ليلي و نهاري.... أنحب

سهم المنيه الجتال.... ما ينمسح عن البال

حرقوا خيمنه

ابعصر عاشورصارت دنيتي ظلمه....رمت قلبي أمر نكبه و اشد صدمه

إنذبح عطشان بالطف نحر ابو اليمه....و بسيوف و عواسل وذروا جسمه

هشم صدره يشابه كسر ضلع أمه....مثل طبرة علي نحره يصب دمه

ما أنسه من طاح جسمه و تقطع....يا ريته يسمع يا ريته يسمع....وني

فوق الرمح راسه إنشال.... ما ينمسح عن البال

حرقوا خيمنه

لمن طاح أبويه اعله الثره اموذر....إجت صوب المخيم غارت العسكر

أشوف الخيل بالأيتام تتعثر....و بالنيران صيوان الوحي اتوجر

اشلون أنسه اليتامه و حالة الخدر....مرعوبه اطلعت و اتوزعت بالبر

من بعد لمصاب راحت سبيه....بين آل أميه بين آل أميه....طلعت

و ابفكري صوت الجمال.... ما ينمسح عن البال

حرقوا خيمنه