خل يطشون السموم ..... خل يلوم اللي يلوم

خل يعادونه ..... ما يهمونه

عله الفطره ابكل حواسيب المنيه امن المهد

اعشقت شبل الغاضريه و أبقه مغرم للأبد

شمعتي ابدنيايه أصبح بالحشر ليه سند

عالعهد لحسين أبقه و أبد ما خون العهد

و العهد رغم العده ..... كل زمان انجدده

و اليضدونه ..... ما يهمونه

يبو اليمه امصابك أفجع للأرض ويه السمه

يبو اليمه امصابك أمطر يوم عاشر بالدمه

ظل الك ينزف مدامع و المهج متألمه

للأبد بالقلب نارك تبقه رمز الغانمه

إلك وسمنه الصدر ..... نلطم احنه ابكل عصر

و اليلومونه ..... ما يهمونه

طيحتك مخضوب طيب للثره يبن الطهر

نحرك المذبوح أفضح كل زمان أهل الغدر

كل زمان انمخلد اسمك يغله دمك كل عصر

محمل الطبره الزينب طبّر أجيال اشكثر

إلك ظنوة حيدره ..... شيعتك متطبره

و اليمنعونه ..... ما يهمونه

انتوب عن كل الأماني عنك انته ما نتوب

عنك اشما بعدونه أرواحنه لجلك تلوب

خل يمنعون لزياره و خل يسدون الدرب

يجري بينه احسين دمك و انته أمنت القلب

فرقتك مر و صعب ..... خل يسدون الدرب

و خل يهجرونه ..... ما يهمونه

ولدك احنه حسين تدري و بيك يكفينه الفخر

يبو اليمه و تدري شوقك بالقلب ويه الدهر

الك للغيرك دموع الليله هلن جالمطر

الك نوح و الك تطبيري و الك دمي انفجر

بالغرب و ابديرتي ..... تظل تذرف مهجتي

بيك مفتونه ..... ما يهمونه