يحسين احنه عاهدناك ..... دنيه و آخره وياك

و بينه اشما تسوي اعداك ..... يحسين احنه عاهدناك

تدري للأبد يحسين تلهب بالقلب نارك

و تدري اشما تمر أجيال انظل انطالب ابثارك

و تدري اتسلحت يحسين هاي الأمه بفكارك

و تدري احتاروا عدوانك اشلون ايطفون أنوارك

و تدري من ادينه اجفوف قصوا لنه خطارك

و تدري بالدم تدري احسين اتعنت كلها لديارك

و تدري اشما يمنعونه اتظل تتوافد زوارك

و تدري ابكل صفر يحسين اتعيد البيعه أنصارك

و عنك ما نجوز احسين ..... لو ذبنه الدهر و البين

نقسم و القسم بدماك ..... يحسين احنه عاهدناك

مدرينه الدهر دولاب و احنه الدهر دولبنه

و مدرينه الزمن غلاب و احنه الزمن غلبنه

و مدرينه يحسب احساب ماضينه و يحاسبنه

و مدرينه حمام الدوح يحجي ابنوحه لو غنه

و مدرينه السعد إلمن قل شدوه و كثر ونه

و مدرينه اشحصل يحسين محنه و خلفت محنه

و مدرينه و ندهنه احسين طحنه امن الولم طحنه

و مدرينه انشطر نصين شرق غربي عالمنه

و مدرينه اليناصر وين و كلها اتحالفت ضدنه

صنفوا أمتك صنفين ..... يمنه لو يسارين

و لدنه ابها المحن بحماك

تونه اعرفنه علتنه و فزينه من نومتنه

تونه ادرينه صرختنه انته و انته غايتنه

و انته للعدل سره بإسمك دارت دنيته

و انته ابطارف كل إلسان و انته أمل أمتنه

و ادرينه بس لمصابك تجري و تهمل دمعتنه

و ادرينه ابحمام الدوح صار ايردد ونتنه

اتوحدنه ابدرب يحسين بيه اعرفنه ارسالتنه

ابدربك مشعل الثوار و بإسمك نعلن ثورتنه

و بإسمك نرفض الطغيان و بإسمك نحي نهضتنه

اعرفنه المرجعيه احسين ..... اتجدد ثورة العشرين

و حته المنتظر يتناك

اعرفنه و ننتظر يمته بيك انوحد الجلمه

و يمته نقلع الأحقاد و يمته نزرع البسمه

و يمته نخذل الظلام و يمته انحرر الأمه

و يمته صرخة المظلوم ينهي كل كافر ظلمه

و يمته الشعب بالأقدام يسحق كل ظالم جسمه

و يمته ضد بني صهيون ياخذ هالشعب عزمه

و يمته نرجع للإسلام و دستور النبي انحكمه

و يمته انطبق الأحكام و يمته الدين انعلي إسمه

و يمته يا عمود الدين ..... و ترجع ثورتك يحسين

ايثور المنتظر وياك