الله الله... يا جاسم عوف اشموعك قوم اتلگه الحسن

اشجايب وياه ... جايب لك ثوب العرسك لو جايب لك جفن

الله يساعد ... هذا الوالد

عله اعيون السموات انطبع رسمك ... بده إلسان الشهاده ايردد بإسمك

من بين الخيام اتراقبك أمك... عله طولك يصد يتمثلك عمك

يهل الرايد تحني اجفوفك ابدمك... تمهل شوف منهو اللي حضر يمك

الوالد وياك ... ما يدري حاضر عرسك لو حاضر دفنتك

عمك ناداك... يالناوي اتحني اجفوفك هذي ابدم رقبتك

شوف اشرايد ... هذا الوالد

الحسن عندك حضر و اعله الخيام ايدور... شايف بيده هاله امبرگعه بالنور

محد يعلم اشراسم إلك المقدور... دمع الحزن لو دمع الفرح منثور

اشجايب ثوب عرسك و القلب مسرور... لو جاب الجفن و السدر و الكافور

كل الأنظار ... مشبوحه و تترقب يا حاله البلطف تصح

بس الأشفار ... يا جاسم تدري ابعرسك ما يكمل تنذبح

ابعينه ايشاهد... هذا الوالد

الحسن عندك جاسم قوم و اتلگاه ... و إنشده الها الزفاف اشجاب لك وياه

اشموع و ثوب زفه شايل ابسراه ... جفن موتك يجاسم شايل ابيمناه

جمع ضدين وجه الحسن شاهدناه... عله اشفافه ابتسامه و دمعته ابيمناه

يا حال ايصير ... ما نعلم يفرح لو يحزن بالطف والدك

ما ظل تفكير ... لا نعرف بيده ايزفك لو بيده ايوسدك

إلمن قاصد... هذا الوالد

الحرب عن يسرتك و الخيل و الأزلام... عله ايمينك يجاسم عايلة و إخيام

عرس و اشموع ترغب لو حرب و اسهام... لن صرخه اعتلت تصرخ يبدر التام

صرخت رمله مصحوبه ابحزن و آلالام... إخذ من إيد إبوك الجفن يا جسام

أمك و أنخاك... يا جاسم هذا الوالد لا تنسه اوصيته

لتعز إدماك ... ينتظرك ترخص دمك و إتقدر جيته

إنت امعاهد... هذا الوالد

إبوك الجفن بيده و طفه كل شمعك... عله خوض الحروب الدامية اتدفعك

و أمك رمله من صيوانها اتشجعك... تگلك ضحي يالطبع الوفه طبعك

و عمك للمخيم رايد ايرجعك... يخاف اعليك اسياف الوغه اتبضعك

تتبع يا صوت... يا جاسم واقف حاير إلمن تنطي الوجه

تقصد للموت... لو ترجع ترمي السيف و لخيامك تتجه

يصبح شاهد... هذا الوالد

يجسام اويه عمك تحجي و اسمعناك... تگله اليوم أريد ابروحي اتفداك

أمي الشجعتني اعله الحرب وياك... گالت لي يجاسم روح ضحي ادماك

إذا شفتك صريع أحمل قهر فرگاك... و أحبس دمعتي ابعيني عگب عيناك

أرجع هيهات... ما إله و فيض الدم يصبح حنتي

ظلت لحظات... يا عمي و تعجن حنت ايدي ابدم رقبتي

و آنه امواعد... هذا الوالد

مثلما كنت يا جسام تتمنه... طحت و بدم وريدك عجنوا الحنه

إخذ روحك إبوك و گصد للجنه... يم الجسد عمك گعد و اتثنه

عليك ايصب دمعته و يجذب الونه... يعاين جسمك بأسياف وذرنه

صار اللي صار... يا جاسم مو جسمك هذا الكوكب منصرع

عمك محتار ... لفراگك لو للأكبر يبجي و يجري الدمع

تدري اشفاجد... هذا الوالد