مرسومه عالبتار ....صورة علي الكرار

بالعز قمر هاشم ....عالمشرعه راسم

صورة علي الكرار

كتاب الله القمر و السور حملاته....جوده و رايته و السيف آياته

عميد التضحيه و للدين غاياته....مثل صولات إبوه الفحل صولاته

محاور أربعه إنرسمن بطولاته....صبر قلبه ضميره و مرضعه و ذاته

سيفه اعله أهل الفيل....يمطر حجر سجيل

و ابضربة الصارم.... عالمشرعه راسم

صورة علي الكرار

مثل خير العمل من وصفه القرآن....ملوك أهل الوصف وصفوا قمر عدنان

سفينة نوح مهره و ماجت العدوان....و إشراع السفينة راية الإيمان

و عله الطوفان إذا ما تسأل الأذهان....صبح دم الأعادي بالحرب طوفان

وارث بطل صفين....رافع لواء الدين

و بموقفه الحاسم.... عالمشرعه راسم

صورة علي الكرار

مثلما رفع حيدر راية المختار....و جرد ذو الفقار و حارب الكفار

رفع عباس راية كعبة الأحرار....قائد جيش إخوه إبساحة الطف صار

مثل سر عصت موسه الذلة الفجار....سيف القمر بيه إتودعت أسرار

ابسيفه الأجل مرهون....ميهمه كل فرعون

رغماً عله الظالم.... عالمشرعه راسم

صورة علي الكرار

مثل حيدر إبوه ابساعة الهجره....لمن بالفواطم أنوه عالمسره

قمر هاشم تكفل رحلة العتره....و إخذ للطف بنات الطاهره الزهره

نصب عباس بيده هودج الحره....رخص إلها العمر و ش اغله من عمره

شمعة حياة احسين....حاماها بالجفين

ريت القمر سالم.... عالمشرعه راسم

صورة علي الكرار

هالجلمه من وجدان زينب تظهر....قالت له من راح القمر و إتأخر

ناحت و صاحت يا ذخيرة حيدر....سالم عساك و ما يصيبك كل شر

ما درت دارت عالكفيل العسكر....و لا تدري جسمه اعله الشريعه اتوذر

و إبساحل الآهات....تتماوج العبرات

طير الحزن حايم.... عالمشرعه راسم

صورة علي الكرار

العقيله بالخيم تحرس خوات احسين....إخوها اعله الشريعه امقطع الجفين

ما راحت له لاجن أرسلت له العين....تشوف ابيا كتر طايح إخوها ووين

تعثر غذت بذيال الحزن و البين....ما تدري تروح و تتجه لا وين

عين العقيله إتشوف....جثه و علم و اجفوف

شافت أسد نايم.... عالمشرعه راسم

صورة علي الكرار

صاحت يالجنت متنوسمه إبجالك....منهو اللي قطع يمناك و إشمالك

يريتك سالم إنته و تحرس إعيالك....و اطيح آنه اعله جرف المشرعه إبذالك

عجيبه اعله النهر تتقطع أوصالك....و إنته الخوف يخشه ايعاين إخيالك

و الفاجعه ابعيناي....رسمت لهيب إضماي

و إنته ابقلب هايم.... عالمشرعه راسم

صورة علي الكرار