هيا خذوني ....اشتاقت عيوني.. كربلاء

محله إسمها كربله قلبي بإسمها مختوم

متغيب عن عيني أبد عيني ما يهناها النوم

ولهانه روحي و هايمه و بصحن أبو اليمه اتحوم

كربله و ماضيها يظل بلساني يتردد دوم

روضة حياتي....خير الصفاتي.. كربلاء

هيا خذوني ....اشتاقت عيوني.. كربلاء

يالقاصدين الكربله وينه اليوديني وين

يرتاح قلبي و خاطري من أوصل القبر حسين

أحرم و أطوف ابحضرته و أنحب و اصب دمع العين

أمنيتي هذي بالعمر خلني أموتن بعدين

بعد المماتِ ....تضمن نجاةِ..كربلاء

مشغوفه روحي ابكربله إخذوني اوياكم يا ناس

حب كربله بقلبي رسخ و أصبح مشاعر و إحساس

أتمنه بيها موتتي أرض الشرف و النوماس

ايغسلني ماي العلقمي و أدفن يم العباس

جنبُ الفراتِ ....مثوى رفاتِ..كربلاء

من كثر شوقي و لوعتي أتمنه عندي اجناحين

واوصل الجنة كربله و أنزل ابين الصحنين

و أزحف لبو اليمه زحف وادموعي فوق الخدين

و أتعنه صوب المشرعه و أنخه يراعي الجفين

في النائباتي ....و الدعواتِ..كربلاء

ما مثل تربة كربله نور الله يزهر بيها

شرفها معبود السمه عز وشرف جاسيها

حسين إشتراها الكربله ابدم رقبته شاريها

للدين كعبه و عاصمه ابها التسميه امسميها

أرضَ الأباةِ ....و التضحياتِ..كربلاء