(موشّح)

يالحسن هاي الوصيه وشوفها كتب جاسم بالدموم احروفها

* * *

يالحسن ياريت حاضر بالطفوف تشوف شبلك جاسم اتحيطه الصفوف

زفته العدوان برماح وسيوف وشالت ابدال الشموع اسيوفها

* * *

برز الهم مثل ليث امن العرين شال يسره الجيش ذبه اعله اليمين

هذا شبلك مابلغ من السنين اثنعش عام وللمنايه ايطوفها

* * *

مثل حيدر صار عالعسكر يحوم أدعه خيل اعداه تعثر بالجسوم

خله كل واحد على الثاني يلوم اشلون هذا الشاب ذل اصفوفها

* * *

حمل خمس اوصاف من غير العزم إبه وايمان ووفه وهمه وحلم

اتراجفت من حملته گلوب الزلم وللهزيمه اتوجهت من خوفها

* * *

وگف مثل الجبل مقدام وصلب والعواصف ما تهمه من تهب

لا يخاف من العده ولا يرتهب سيفه أنزل عالاعادي حتوفها

* * *

من بعد ماثبت للگوم وحمل ظلت اتراوده شفرات الأجل

يالحسن شبلك العريس انچتل والمنايه قدمتله چفوفها

* * *

يالحسن شبلك ذبيح اعله الصعيد والوصيه انخطَّت ابدم الوريد

هذا جاسم طاح بالمصرع شهيد والشهاده اتشرفت بضيوفها

* * *