من سقط منك علمنه ..... او من طحت عالمشرعه

الخيل اجتنه او فرهدتنه ..... يا جفيل العايله

جَني ابزينب غريبة ..... او حايره بأمر الحرم

لا حمه اليحمي حماها ..... لا جفيل و لا خيم

حرقت اعداها الخيمها ..... و الخدر منها انهدم

يا رجانه ..... و بلوانه

و بحمانه ..... من تعهد و التزم

او من توزم بالضعينه ..... او ناشر ابجفه اللوه

ما يمر بينه الهوه

قلبي مستر ..... يبن حيدر

و بحماك امدلله

ماني اختك و انه زينب ..... يا الحديت بناقتي

كَتلك ابشيمة الخوه ..... و انت قلت بشيمتي

ما تعز اعليك روحي ..... دونك ابذل مهجتي

و الزم الحد ..... بالمهند

الله يشهد ..... حافظت لي عزتي

يا حمه احدود الفواطم ..... و الأمان من الخطر

يا من الهاشم قمر

دللتنه ..... او خّدرتنه

او نزلتنه ابكربله

و انصبت صيوان خدر ..... أختك اعلى هامات الفلك

و الوفه ثوب او تفصل ..... يبن أبوي بس الك

و ما مَلِك بالكون مالك ..... مثل ما شخصك ملك

نور علمك ..... نار عزمك

و روح جسمك ..... نور قدسية ملك

سالمت يّد الكرامة ..... و بالمكارم منفرد

و المغانم و المجد

بالحماسة ..... او بالفراسة

زود أبوك اتمثله

جانت أيامي مزهرة ..... ابنورك الماله مثل

بيك و بهمة عمامك ..... جان منطور النزل

و الفلك طرني يخويه ..... و رحتوا من ايدي جتل

زاد وني ..... او ثقل حني

او رحتوا مني ..... يا هلي حته الطفل

و أصبحت حرمة او غريبه ..... ابكربله او متحيره

و العيال اميسره

روحي ..... قلبي يسعر

و المدامع هامله

جني بزيني تنادي ..... ابعبره و المدمع يسيل

يا عباس الخدر راح ..... او للحرم ما ظل جفيل

دسمع امعاتب اعيالك ..... و اسمع الحن و العويل

هلله هلله ..... اشلون خِله

العطش خَله ..... النار تسعر بالدليل

نار المخيم مسعره ..... او جلمة النار الظمه

و الودايع فاطمه

يسروها ..... او قيدوها

و العليل بسلسلة

جني أسمع صوت مخفي ..... ظهر من كتر الشريعة

السهم البعيني ضهدني ..... يختي و اجفوفي قطيعة

و انقضه حق العليّ ..... او تعذريني يا الوديعة

بيش أجاهد ..... الله شاهد

مالي ساعد ..... ضعتي يختي اشلون ضيعة

لون عندي اجفوف جان ..... او ساعدي السيفي يزم

جنت اراويج العزم

ما تجيني ..... اتشاهديني

اشلون جثتي امثلمه

جني بزينب فجعها ..... صوت اخوها و انكسر

ظهر زينب مثل كسرة ..... ظهر محزوز النحر

يعباس اشلون عمله ..... عمل ويانه الدهر

خان بينه ..... و انولينه

و نسبينه ..... و صار البينه الما صدر

او غابت ابدور السعادة ..... و البيوت اتهدمت

و الأمور اتغيرت

قلبي عطّب ..... و آنا زينب

و الصبر اتحمله