يا كربله يا كربله .... حزنج يرد الأوله

يا كربله يا كربله

يا كربله من يا جرح أبدي و أسولف يا ألم

لليوم لو هب الهوه ايشممنه عطاب الخيم

لليوم يدوي و ما هجع يا كربله صوت الحرم

يا كربله وشجم صبر ركنه ابحزن بيج انهدم

تبقه المدامع هامله ....يا كربله يا كربله

يا كربله عندج قبر أطيب شفاء ابتربته

باب الدعاء اشما عسر قبله جليل ابحضرته

ينطي الأمل اللي عطه باجر شفيع الشيعته

و اليقصد المكه و يحج حجة الشيعه ازيارته

وياج لمعاتب حله ....يا كربله يا كربله

يا كربله ليش القلب من يذكر إمصابج يحن

واحدنه من يفقد محب يمكن سنه ابفقده يون

مرت على احسين اشكثر أعوام نبجي و ما نعن

يا جنة الشيعه و تره غيرج عله الشيعه سجن

يمته ترد القافله....يا كربله يا كربله

قصرين للطيب انبنن لحسين و اعضيده القمر

و اتقابلن أم الحسن و أم الغفه ابشاطي النهر

أم القمر موعظنه أعله احسين محنيه الظهر

فاطمه اتنادي و ثاكله ابعباس صوبني الدهر

الله يعين الثاكله ....يا كربله يا كربله

يا كربله بعدج صعب و انسد عله الشيعه الدرب

و ازيارتج من هالبعد ما تطفي نيران القلب

لو ما أطب الحضرته ابلوعه و جفن عيني يصب

ما أروه منج كربله و الله القلب مل الغرب

روحي اشكثر متحمله ....يا كربله يا كربله

يا كربله ما ناشدج قلبي على أحبابج أبد

و عاشور لو مرج عله العافوا وطنهم ما نشد

وفينه وياج الوعد نترجه من عندج وعد

يا بلد عزتنه فلا غيرج يصير إلنه بلد

يمخدره و يمدلله....يا كربله يا كربله