يحسين و كتبنه إسمك* ابدمنه ابصفحة الوجدان

عاهدناك *ما ننساك* يا بو اليمه ما ننساك

و ميهمنه التعب يحسين لو نقضي العمر خدام

تاج الشرف هالخدمه و بيوم القيامه اوسام

و هذا العهد ما ينزال و ننصب مأتمك كل عام

اعلينه من يهل عاشور نبجي و تثقل الآلام

و من نلبس اثياب السود و نرفع للحزن أعلام

و لمن نلطم و نحزن و لمن نلطم اعله الهام

و نثبت حبنا لك يحسين و ننصر ثورة الإسلام

و لو نفرض تهجرنه وراوونه سجن و إعدام

و أنصارك نظل يحسين و اللي تشهد الأيام

و فطرة شرف فطرتنه ....و هالخدمه محبتنه

واقع عن عقيدتنه

حبيناك ناديناك.... يا بو اليمه ما ننساك

صرخه امن الضماير هاي مو لفظه اعله طرف إلسان

بيعت شرف بايعناك و إسمك للشرف عنوان

و أمك فاطمه الزهره و جدك سيد الأكوان

و الوالد علي الكرار حيدر داحي البيبان

و ضيك من قبل آدم جان ابذروة الرحمان

و الذبح العظيم إنت و عنك آيه بالقرآن

و إنت القدمت يحسين للباري النحر قربان

و إحنه نطل خدامك و موكبنه اليظل برهان

و هالموكب حمل عنوان جدك يا عظيم الشان

بالمال و نزف دمنه أقسمنه نشد بنيان

لمن نتعب و نسهر ....نربح والله ما نخسر

الشافع إنت بالمحشر

و إخدمناك نترجاك.... يا بو اليمه ما ننساك

بالطف موقفك يحسين موقف حير الأفكار

ابصبرك مثلت جدك طاها المصطفه المختار

و كنت اتمثله ابعزمك عودك حيدر الكرار

و للدين أصبحت محراب و كعبه أصبحت للأحرار

و نحرك من أجل دينك قدمته الشخص جزار

و تدري لو نزف دمك و كل قطره يصيح الثار

الدم الطاهر اتعوفه و هو اليغلي بالبتار

و تعلم لو متت مظلوم تلقه ابكل زمان انصار

و اجفوف و ذهب تفدي و تقصد حضرتك زوار

و عنك ما تبعدنه و كلما جارت الأشرار

و كل شخص اعتنه ابلهفه ....و قدم للقطع جفه

و فضل امحبتك انعرفه

و رغم إعداك بايعناك.... يا بو اليمه ما ننساك

هالمنبر يبو الأحرار لمن نقعد ابظله

نستلهم عبر و ادروس و نقدر نعرف العله

و رايه اعله النهر طاحت اشلون أصبحت تتعله

و شيعين الدمع يحسين عل الخد لمن إنهله

و سر حبك يبو السجاد مثل الشمس يتجله

و إنت اللي صحت بالطف نرفض واقع الذله

و من اقرابه سيف الحق ابوجه الظالم اتسله

و بشخصك تمسكنه و ما نخضع و نتخله

و جذم العهد عن دربك لون الموت مَنزله

و الله اليعلم ابها الحال ....نفدي المهج و الأموال

و ذوله إحنه ابدمع همال

ناديناك نترجاك.... يا بو اليمه ما ننساك