عن حبك يبو اليمه ما نتخله مهما ايكون

لو هالحب يكلفنه عمرنه لك عمرنه ايهون

نحجي و تسمع الوادم و انخاطب جميع الكون

أنصارك إلك بالروح بالدم سيدي يفدون

يفدونك بالغالي العدهم....كل أعداءك خل تسمعهم

لمن جنه بالإصلاب يا بو اليمه عاهدناك

نهتف نعم هاليوم و انجدد عهدنه اوياك

نقسم لك قسم يحسين نقسم و الله ما ننساك

نقدم لك هديه الروح و انقدم عمرنه إفداك

و نفدي الأرواح و ما نهتم....و إندافع عن حبك بالدم

حبك يا أبو اليمه يسري اويه الدمه بينه

و من حبك يبو السجاد تروينه و تغذينه

و اعله امحبتك يحسين يا الغالي تربينه

نشأنه و صارت امحبتك هويتنه يوالينه

عشاق حسين يسمونه

نغم إسمك عله إشفافي عسل لفظه اعله كل إلسان

و أظل بإسمك يبو اليمه و إبشخصك أنه ولهان

أظل عاشق إلك يحسين و أظل بمحبتك فرحان

يظل قبرك إلي كعبه و إتظل كربله عنوان

و إتظل أرض الطف عنواني

وسيلتنه يبو اليمه انثبت عقيدتنه

منعوفك الحد الموت و ابحبك شهادتنه

من حبنه كتبنه إسمك يا الغالي اعله رايتنه

و إتظل للأبد و الله آه يحسين جلمتنه

صرختنه اتظل بإسمك عالي....للموت انادي و منبالي

انادي بإسمك ابكل حين رغماً عاليضدونك

ندري هالإسم ثوره بوجوه اليعادونك

شعار إسمك يظل يحسين للناس اليحبونك

ما ينسونه لا و الله يحسين و مينسونك

ننسه الروح و ما ننساكم