وحيده و كل هلي راحوا و خلوني

دليلي يلتهب نار .... حزينه وحدي بالدار

عليله و بالدمع متفايضه اعيوني

طفله ظلت بالمصايب حايره بأرض المدينه

اتصيح خلوني وحيده و راحوا أهلي اويه الظعينه

وين أخويه علي الأكبر وين ابو حسين وينه

ذايب قلبها امن المرض .... و الجفن لحظه ما غمض

و العلل تمشي اويه النبض .... عقب ولياها حزينه

تنادي امن الحزن شيطفي نيراني .... أون و أنحب و أحن من عقب ولياني

عقب ولياني لطهار .... حزينه وحدي بالدار

عليله و بالدمع متفايضه اعيوني

من عقب أهلي عليله و العلل ذوبت جبدي

و أصبحت بسواط النوايب و الأهل لاوالي عندي

ليش عافوني عليله ليش أظل بالدار وحجي

مصيوبه بفراق الأهل .... و انقطع من عندي الأمل

شيطفي جمرات العلل .... دهري و الآلام ضدي

رمتني الفاجعه و اتصوبت روحي .... عقب أهل الشيم شيضمد اجروحي

عليهم فكري محتار .... حزينه وحدي بالدار

عليله و بالدمع متفايضه اعيوني

روحي ظلت بالمدينه و قلبي فوق الظعن حايم

وين ابويه القال الأكبر يعتنيك و قمر هاشم

وين الأكبر ما وصل لي وين عمي وين جاسم

عافوني وحدي ابعلتي .... و جارت عليه دنيتي

و افراق زينب عمتي .... خله دمع العين ساجم

مشوا عني اشعجب ولياني عافوني .... اسبب من الطفل عبدالله حرموني

بعد ما اعلم اشصار .... حزينه وحدي بالدار

عليله و بالدمع متفايضه اعيوني

قبل ما يطلع ظعنهم صحت و الدلال دامي

قلت له يا بويه أريد الطفل خلي الطفل يمي

من أشوفه اتهيد روحي و من أشمه ايزيل همي

جاوبني و ادموعه تهل .... هالسفره واجب عالطفل

و الكربله واجب يصل .... حته أشوفه ابسهم مرمي

عله عبدالله واجب صارت السفره .... و أخبرج حرمله العبدالله ينتظره

خبرني و الظعن سار .... حزينه وحدي بالدار

عليله و بالدمع متفايضه اعيوني

هالخبر صوب مهجتي و خله نار القلب تسعر

اشما تمر بيه الليالي النوب نار القلب تكثر

اشما أشوفن شاب أنحب و قلبي يذكر علي الأكبر

مفجوعه روحي هايمه .... و اعيوني تتفايض دمه

و أحسب انجوم البلسمه .... و السهر عالعين أثر

يبويه امن السهر متوجد اعيوني .... وسافه ابها الوضع وحدي تخلوني

فقدكم صاب الأنظار .... حزينه وحدي بالدار

عليله و بالدمع متفايضه اعيوني

ابديت أناشد روحي لاجن ونتي صارت ثجيله

لو قصدهم ما يصير اويه الظعن أمشي عليله

ليش زين العابدين أخذوه و العله ابدليله

ابها الأمر روحي حايره .... و الدمع من عيني جره

طول الليالي ساهره .... و ليلة المحزن طويله

صحت يهل الفخر شيضمد اصوابي .... أعاتب و محد يسمع اعتابي

عليله و الدهر جار .... حزينه وحدي بالدار

عليله و بالدمع متفايضه اعيوني

حقها هاي الطفله حقها لو رادت تعاتب

و حقها ما تدري بأهلها اتطيح صرعه عالترايب

و لا درت عمتها زينب تبقه ما بين الأجانب

و لا تعلم ابها العايله .... محتاره تبقه ابكربله

و لليسر تمشي الراحله .... و باليسر تحمل امصايب

متدري بجسم أبوها اعله الترب دامي .... و متعلم بالرضيع المنذبح ضامي

تصيح الدهر غدار .... حزينه وحدي بالدار

عليله و بالدمع متفايضه اعيوني

طفله حقها من تعاتب حقها من تهمل المدمع

أظن ما تدري بأخوه اعله الترب جسمه تقطع

ولا درت جاسم ذبيح و حنته من دمه المصرع

و لا درت يم المشرعه العباس جثته اموزعه

و اجفوفه يمه امقطعه .... و لليسر هالعيله تطلع

اشتقول الطفله هالموقف اتشوفه .... حرم متيسره و مسبيه للكوفه