أمشي اوياكم .... أمشي اوياكم

ما بيه أتحمل فرگام

لا تودعوني .... يا بويه

لا تعوفوني .... يا بويه

***

ناحت و صاحت بويه كلي اشها الخبر .... يحدي و ما ريض حاديكم

من المدينه اليا كتر هذا السفر .... أمشي أوياكم لو تانيكم

خوفي عليكم يا هلي من الدهر .... غدار و لن يغدر بيكم

يا بويه هذا الدهر ظالم غدار .... لو رحتوا عني ما ترد ليه أخبار

يتكطع امن الضيم كلبي المحتار .... المن أظل عندي اشبعد ظل أخبار

اوياكم اخذوني .... يا بويه .... ولا تعوفوني .... يا بويه

***

عالوجن دمعي جالجمر يهلي همل .... و آنه اسمع حاديكم يحدي

آنه العليله يا هلي اشعندي أمل .... لو رحتوا و ظليت الوحدي

من يمي لو وافاني يا بويه الأجل .... جتاله اجروحي و هالتدي

من المرض حيلي انهدم و الالام .... و جرح القلب كلش صعب ما يلتام

و هذا الشمل ياوسفه شت و ما دام .... لبدي أنتظر جيتكم أحسب أيام

و طبقت اجفوني.... يا بويه .... ولا تعوفوني .... يا بويه

**

بويه و أظن تدر المرض ما ينحمل .... من يبكَه اويايه ايباريني

خل يظل يمي بويه عبد الله الطفل .... عن هاي الوحشه ايسليني

بلجن أتشافه و ينكطع دمعي اليهل .... من أسمع صوته ايناغيني

عبدالله خويه امعلمه أتناغه اوياه .... بالمهد مثل الكمر وجهه أشمحلاه

لو عني راح أشلون أكدر أنساه .... و الدار الوحشه تظل بويه بلياه

عاد ارحموني.... يا بويه .... ولا تعوفوني .... يا بويه

***

و احسين أبو اليمه سمعها و عالوجن .... نزلت من اعيونه الدمعه

جاوبها و بوسط القلب نار الحزن .... و بجمرة الآلام اتلسعه

عبدالله لو راد الثدايا أمه يحن .... لو ظل يمج منهو يرضعه

الطفله و عليله احتار شيجاوبها .... و كل شي كلف ما ينحما مطلبها

خايف عليها احسين قلبه ايحبها .... سهم الموادع خايف ايصوبها

و خابت اظنوني.... يا بويه .... ولا تعوفوني .... يا بويه

***

من مشوا ردت و ايعثر منها الجذم .... قطعت من عدهم كل ظنها

بالقلب حسره وزايد اعليها الألم .... و الروح الما يهجع ونها

يا جدي صاحت مو تره حيلي انهدم .... وحشة الدار وراحوا عنها

يا جدي ودعني و مشه أبويه احسين .... لا رد خبر لا أدري كاصد لاوين

كلبي لجمني و خوفي من غدر البين .... و الدار وحشة عقب أهلها الطيبين

و انخطف لوني.... يا بويه .... ولا تعوفوني .... يا بويه

**

لبگه أنتظركم يهلي و اكعد عالدرب .... بلج اتعودون أتنطركم

و أنشد الرايح و اليجي و دمعي يصب .... حته من الطير أنشد عنكم

يا هلي و ما تطفه أبد نار القلب .... لمن طارش يوصل منكم

لو طولت يهل الشيم غيبتكم .... ودوا لي طارش يا هلي امروتكم

ايخبرني عنكم عن وضع حالتكم .... ليل و نهار آنه أنتظر جيتكم

و شابحه اعيوني.... يا بويه .... ولا تعوفوني .... يا بويه

**