الدنيا للعبا الخمسة بأهلها

ولون ما نوره ما جت بأهلها

النصارى بيمن الهادي بأهلها

بعلي وأولاده والزهرة الزكيه

علي أحزاب الشرك فلش وكرها

إركَاب الزلم ذللها وكرها

إليشك بفضله ابغضنه وكرها

وألعنه بكل صباح ومسيه

علي حاشه إلي تقصده يردها

وبالمحشر إمن الكوثر يردها

الدنيا لو إله رغبة يردها

حكمها بسيفه حماي الحميه

يحيدر معدنك مرجان يندار

و ابجفك مدار الكون يندار

ابوجودك يا أمير النحل يندار

ينبوع المياه الكوثريه

علي طينته الباري من عيَنها

ذر و ذهب صافي من عينها

الشمس ردت ذليله من عينها

تقبل غدت جف حامي الحميه

اشبله كَلبي يحارجني يا با الغيث

شبه عود العشب لاوي يا با الغيث

إجيتك معتني شاجي يا با الغيث

اغثني إلتمن اهمومي عليه

تاه العقل و انته اتعرف ونته

و دليل المحب بإسمك تخف ونته

محمد سيد الأكوان و انته

ناموس الرياض الإلهيه

علي حبه أمان و شرف و الجن

بالمحشر قسيم النار و الجن

إبو ابو الحمله إمام الانس و الجان

وصي المصطفه و للخالق وليه

و حق موسه و جبل طوره وناره

تجله الحق لعد عيني وناره

بيت الله انولد حيدر وناره

سطع عالأرض و السبع العليه

يا أحله من القمر على الناس هليت

بإسمك يا وصي المختار هليت

عله بيت العباده اليوم هليت

و بيها ضيّفك رب البريه

اليوم العيش بيَّ طاب وهنه

إنولد حيدر و جسمي وهنه

إهنا بحر الكرم و الجود وهنه

الحكمه و العلم و العبقريه

اليحبك طاب من أصله وذره

و قصره بالخلد يمك و ذره

إنت الذهب يا حيدر وذره

ابوسط تاج الرساله الأحمديه