بالطف ليلة التوديع حضرت فاطمه الزهره

تعنت و بضلع مكسور تون يم زينب الكبره

بممشاها إجت تعثر و ما بين الخيام اتدور

ساعه اتطيح ساعه اتقوم دمعها اعله الوجه منثور

اعله النوح و الآلام تعنت و القلب مجمور

وصلت خيمة العصمه ..... و سمعت صوت أبو اليمه

و سمعت زينب اتحشمه ..... تناديه و يناديها

يخّبرها و هي اتخبره ..... حضرت فاطمه الزهره

شافت منظر التوديع القلب العايله ايقطعه

كل نوح و عتب زينب صارت فاطمه اتسمعه

تقله لا تودعني افراقك خويه شيجرعه

بعيالك توصيني ..... تودعني و تحاجيني

وحدي لا تخليني ..... اعيالك من يباريها

و قلبي يا هو اللي ايصبره ..... حضرت فاطمه الزهره

ايقلها احسين يا زينب لله فوضت أمري

مو بيدي و لا بيدج لازم ينقطع نحري

الشمر لازم تشوفينه يتربع على صدري

و فاطم لطمت الخدين ..... من سمعت كلام احسين

بقلبها اتفرسن سهمين ..... سهم زينب و محنتها

و سهم اليعتني النحره..... حضرت فاطمه الزهره

يقلها يختي يا زينب الصبح باجر لون صبح

أنه و كل أهل بيتي و كل شباني نتذبح

دمنه بساحة الميدان مثل ماي النهر يطفح

يختي امسلب و عريان ..... متوسد عله التربان

يذبحوني الكفر عطشان ..... و خلف الخيمه أم احسين

كامت تنحب بعبره ..... حضرت فاطمه الزهره

يقلها الخيل يا زينب من تهجم عله اخيامي

تشب نار الحقد بيها و بعدها تسحق أيتامي

تقلله وين أروحن وين ما يبقه إلي امحامي

اعيالك هاي وين اتروح ..... وانته اعله الترب مذبوح

امغسل بالدمه المسفوح ..... كللي وين أتوجه

و انتوا نومه عالغبره ..... حضرت فاطمه الزهره

أطلع للمعاره أنظر جثث متناثره بوديان

أرجع للخيم و ألقه بيها اموجره النيران

و أنه بين هاي و ذيج و بين امراكض النسوان

و أقصد للنهر يحسين ..... و أشوف امكطعه الجفين

عسن تعمه يخويه العين..... جفيلي اعله النهر نايم

يا عيني الي اتنظره ..... حضرت فاطمه الزهره

الله ايساعد الزهره قلبها بهالمسيه اشقال

مدري تستمع زينب و مدري الصرخت الأطفال

لمن طر صباح البين و شافت عينها الأهوال

ما بين الضحايه اتحوم ..... و تعنت و الضلع مهشوم

اتنادي اوليدي يا مظلوم ..... يا هو اللي قطع نحرك

و يا هو اللي سحق صدره ..... حضرت فاطمه الزهره