يالقاصد القبر احسين هاك إحمل رسالتنه

ابدم العهد مكتوبه شاهد عن محبتنه

للطف ساعة التوصل روح القبر أبو السجاد

قله أنصار الك يا حسين ما صدق عليك ابعاد

يمك عافت الأرواح و بالغربه تعيش أجساد

و قله تلهج بطرواك ..... و ما خانت عهد وياك

الآخر نفس ما تنساك

و ابوجه الزمان اتصيح يا قائد مسيرتنه

رادونه و لو ساعه عنك نبتعد يا حسين

و إنته عايش اويانه و ما ننساك طرفة عين

و نشعر بالوفه وياك مثل اللي يوفي الدين

راوونه اشكثر آلام ..... تهجير و سجن و اعدام

بينه إحتاروا الظلام

شافوها ابربيع الدم تثمر غضب شجرتنه

كل ظنهم خريف الموت ما يترك ورق بيها

ظلت بالوفه اتبرعم و سيل الدمه اليسقيها

أموال و أهل و أرواح من أجلك نضحيها

إنته النه الدرب خطيت ..... ابكل معنه الوفه وفيت

و من بعده طفل ضحيت

من عندك تعلمنه نتوصل المحنتنه

أشلون البيك متمسك ابحق المبدأ ايجامل

يا حسين القياس انته بين الخير و الباطل

و شيمت منبرك يا حسين ما خرج المتخاذل

خرج كل زمن أفطال ..... ضربوا أروع الأمثال

أجيال بأثر أجيال

كلها يا بو اليمه اتقول حبك سر عقيدتنه

و احنه ابمثل هالليله نذكر شرف ماضينه

من وادي الغري يا حسين للطف من تعنينه

الواجب تضحيه من راد احنه ابفخر ضحينه

و صحنه ابصرخه ثوريه ..... و لهجة حب حسينيه

و طيبتنه نفس مرضيه

صحنه يا هله بها الموت البيه عزتنه و كرامتنه