من طف الحريه ..... صوت الإنسانيه

ابكل جيل ايظل هادر ..... صوت احسين الثائر

صوت الإنسانيه

صوت من وادي الطفوف انطلق بالله اعتصامه

احسين ما باع الكرامه و ثورته بسعر السلامه

سحگ وجه المستحيل و كربله اتقبل أقدامه

و الجرح ما بيه توريه ..... ينجعل دم للتضحيه

ايصيح ابوجه كل طاغيه ..... لا حياة بلا كرامه

بجروحه الثوريه ..... هز عرشه و طاغيه

هالصوت من ايكبر ..... يرعب كل متجبر

صوت الإنسانيه

احسين راد أصوات حره تنطلق من كل مفكر

و احنه ردنه بهاالظروف أصوات تعمل مو تخدر

شلنه بالخيمه الما تمطر شلنه بالشجره المتمطر

مطلوب جف يمسح دمع ..... مطلوب إصلاح الوضع

و الشق إذا ظل يتسع ..... اعلينه حته القط يزمجر

و بإسم القوميه ..... اتطب أفعه السوريه

ذبت سمها اعلينه ..... ما تدري اليحمينه

أمس بالموصل مجازر أمس بالحله قتلهم

و خجلوا حته الجريمه الأردنيين ابفعلهم

و لن أبو الجولان طالع يسفك الدم هم مثلهم

جولانه محتل بيه قبل ..... و اعلينه برهابه دخل

يا بو الوليد إنته البطل ..... إنته بالمرصاد إلهم

للقوه الذئبيه ..... بشارتنه اشويه

مو دمنه ابجولانك ..... خل يسمع وجدانك

انعقدت القمه و أملنه العقد تنحل بالجزائر

و مثلما راحت إجتي املوكنه امسوده الدفاتر

جن و لا هذا شعبنه ايعيش يوميه مجازر

لا ملك من شعبي اعتذر ..... لا رئيس ابصوته جهر

و انصابوا ابقصر النظر ..... و نسوا دورات الدوائر

نظرتهم سطحيه ..... و لمتهم وقتيه

و اتفقوا علفرقه ..... بس خطوا عالورقه

فقد لبنان الحريري و لجله هالعالم اتأثر

و عدنه راح اشجم حريري و لا طلع واحد استنكر

ليش دمنه ايحسبه ماي و ساكت الجامع الأزهر

هذا سكوته ابها الوضع ..... يعني ابذبحنه مقتنع

يا شيخ لزهر كل شرع ..... ايحرم الدم لو تفجر

شتقول الشرعيه ..... بهاي التكفيريه

و بفعل الزرقاوي ..... شيقول القرضاوي

يا حماة الوطن هذا الوطن ضد الطائفيه

و بيه أشباه الرجال القتل عدها اعله الهويه

و بيه أقزام العروبه ابراسه صاروا قومجيه

بيه نفط بيه محتل شرس ..... بيه الجرايم من أمس

مو حته الاعمه باللمس ..... شاف أوضاع الرعيه

بين المصلحجيه ..... و بين الارهابيه

هذا الوطن حاله ..... خل تسمع ارجاله

هذا يا قادتنه جانب يفرز اهوايه متاعب

و جانب الدستور عدنه أهم من كل الجوانب

دوله إسلاميه حره للشعب تجني المكاسب

دستور إسلام الشرع ..... يحفظ حقوق المجتمع

ميهمنه صوت اللي طلع ..... و ابحكم علماني راغب

رايد علمانيه ..... بها الديمقراطيه

شيگول العلماني ..... بآراء السيستاني

يظل للحق صوت يدوي و يخترق كل المسامع

تنفني اعروش الطغاة و شامخه تبقه المصارع

احسين ضحه بقطع نحره و قاسه كل ذيج المواجع

من أجل رايه ترتفع ..... عطشان نحره ينقطع

و ضحه بطفله اليرتضع

و خله صوت الجرح و الدم خالد ابكل دور خالد