ذكرك من يمر يا حسين تاريخ المجد يخشع

و ايدنگ عله اعتابك يبجي و يسجد و يركع

يم بابك وقف محتار من الخجل يتردد

من ايوصفك شيگول فضلك ما يعده العد

إنته البيضت وجهه و لو إنته لسه أسود

شفته طايح ابجزره و من منحرك فاض المد

جان بآخر الأنفاس ..... و يمكن يندفن ينداس

يالوشحته بالنوماس

و خليته ابوجه لليوم بيه نور الفخر يسطع

دين المصطفه جدك محني الظهر و اتنظره

لمن ينحني ظهرك يصحه و ينعدل ظهره

و ابقص رقبتك مرهون عدله و هيبته و قدره

ثابت صحت وين السيف شنهي بعد ينتظره

راسي خل يجي ايقصه ..... الدين المصطفه حصه

و تبقه عرقت القصه

ما أقبل ابذله انطيح اشما جان الثمن أدفع

دفع الثمن عدنه ارخيص بس عدنه الشرف غالي

و من طبع الكرامه اتريد نشمي و جسر ميبالي

ابراسي ابجبدي و جسمي و كل أطفالي و اعيالي

أفدي و يظل دين الله راسه ابكل وكت عالي

و الگالوا طحت ماطيح ..... ثابت ما تهزني الريح

و صوتي للسبع ديسيح

أرفض مبدأ الذله و للظالم فلا أخضع

جازيته و رفع شانك و عظم قدرك المعبود

و ابكل بلد بالعالم ننظر مأتمك معقود

و المستغرب الحاله و ينشد عالسر الموجود

كل هذا الحدث تمهيد الجيت الغايب الموعود

شاءت قدرة الجبار ..... كلها اتردد الأقطار

ما تنهض يا راعي الثار

تآخذ ثار أبو السجاد و طفله البلمهد يرضع

سر ابمصرعك يحسين الله اليعرف أسبابه

البيه أكلف و أشد يحله يشفه بشمة إترابه

يحسين التراب الصار من دم نحرك إخضابه

مبخوت الذي ايشمه ايفوز ابساعة إحسابه

نحرك يا نحر مثله ..... و جان المصطفه ايقبله

أصبح للشرف قبله

و من أطهر صلب يا حسين و من أشرف و أجل مرضع

صرخت موقفك يحسين شوف اشأثرت لليوم

خليت الذليل ايعيش ما بين الخلق مذموم

و عزيت التمسك بيك رغم الموعد المحتوم

حته الما هو مؤمن بيك قام ايصيح يا مظلوم

و يا هو القدر يتحداك ..... و يتنافس ابفخره اوياك

ربك فضلك علاك

يا أوسع سفينة فوز و الخير الجنان أسرع