مسلم عليك الروح ولهة وحزينه

غير النحب والنوح شيطح بدينه

* * * * *

يومك يا مسلم صار يوم والف يوم

وضيم وجذب حسرات ومرادف هموم

حدر الجفن عبرات ومقاطر دموم

وغفوة توالي اليل شحت علينه

* * * * *

مسلم عليك الروح طافح واجلها

خلها بهواها تنوح مهضومة خلها

هضمك هضم جتال زيد عللها

وللكوفة حادي البين مشبوحة عينه

* * * * *

وكل ما اصد للماي ياخذ لي تذكار

وأذكر وقفتك ذيج يم عتبت الدار

وجيت على طوعة بروح تتواقد بنار

وقلبك يذوب صخور بجمرة ونينه

* * * * *

وطوعة اجت وتريد من عندك جواب

شعندك يا مهموم واقف على الباب

وقلت الها قصد الماي هرش الجبد ذاب

وروحي اعله جف الموت صارت رهينة

* * * * *

ماي اليجيب الموت ما ظنتي يفيد

وقالت شربت الماي يا مطلب اتريد

وجنك غريب وصار درب أهلك ابعيد

من يا أهل من يا دار ومن يا مدينة

* * * * *

قلت الها أهلي إبعاد ما هم جريبين

من هاشم و منسوب للهاشميين

بالكوفه قوم ازياد خانتني هالحين

مسلم أنا المعروف ليث العرينه

* * * * *

قالت هله و حياك يبن الأطايب

عمك علي الكرار ليث الحرايب

احسبها دارك هاي لاون تناسب

و خدامك احنه انصير لو ترضه بينه

* * * * *

بسما دخلت الدار لن قوم أميه

انبعثت الك جيمان لن بالوطيه

خفق اعليك اهناك جنح المنيه

و دارت عليك اسيوف أهل الضغينه

* * * * *