الليله زينب..... عجنت الحنه

عريس جاسم حوفته.... الليله نصبوهه

****

رمله بخدرها مهلهله ومسروره...... بزفة ولدها

من تنظر لجاسم يهلهل نوره.... يفرح چبدها

شگر الذوايب عالمتن منشوره.... چوچب سعدها

رمله تتهنه.... بنور المچنه

وشمعة شبابه بحوفته الليله علگوها

------

أگبل لعمه شبل من هاشم شاب..... ما بلغ حلمه

يتبختر بين إخوته والأصحاب.... بهمته وعزمه

للحرب ينزل دون ابن داحي الباب.... ثابت الهمه

نادى ياعمي.... ما يعز دمي

وأهل المچارم للمچارم ما يعيفوها

------

عريس جاسم وإخوته يزفونه ..... چالبدر يزهر

وحسين راد بعرس نور عيونه..... دلاله يستر

وجاسم گضه وظل بالگلب چانونه.... نيرانه تسعر

يالوسف جاسم.... عالترب نايم

بچتلة شباب الغانمه رمله فجعوها

------

بجاسم غدر سهم الگدر وگصوره..... بالدم تحنه

ورمله افگدت عزها وبگت مكسوره... تجذب الونه

متچدره ومتحيره ومجموره ...... بفگد المچنه

صاحت ياهاشم..... من عگب جاسم

المن تعلگون الشمع ماتطفوها

------

بصوت الحزن رمله تحن وتنادي..... يبني افجعتني

ياسلوتي وياضيعتي بهالوادي..... يالضيعتني

ياجبرتي ويامهجتي البفّادي.... ليش إتركتني

ياضوه عيوني.... بيك إفجعوني

من يحضر أمك لليسرمن يمشوها

------

برباك يبني ذاب شحم عيوني...... وردتك مچنه

ماچان ظني بكربله يفجعوني.... واگطع الظنه

وشعتبرعگبك يبني لو نشدوني.... وليدچ تحنه

لليفجدونك... واليدورونك

شتعتبر أمك يوليدي من ينشدوها

-----

ظنيت يوليدي تهيل ترابي.... وتحزن عليّه

ماچان وادي كربله بحسابي..... وهاي الرزيه

ياحسرتي ياكسرتي بمصابي.... بالغاضريه

ساعه وسبوني..... من يمشوني

جثتك تظل على الثرى وما يدفنوها